തിരൂരങ്ങാടി: വേനലിന്റെ തീക്ഷ്ണതയില്‍ ആളുകള്‍ കുടിവെള്ളത്തിനായി നെട്ടോട്ടമോടുമ്പോള്‍ മമ്പുറം മഖാം കമ്മറ്റി നടത്തിയ ശുദ്ധജല വിതരണം ക്ഷേത്ര കമ്മറ്റിക്ക് വലിയ അനുഗ്രഹമായി. മമ്പുറം കുന്നുംകുലം ശ്രീ കുറുപ്പ ഭഗവതി ക്ഷേത്രത്തില്‍ നടന്ന ഉത്സവത്തിനാണ് മഖാം നടത്തിപ്പുകാരായ ദാറുല്‍ഹുദാ മാനേജിംങ് കമ്മിറ്റി സൗജന്യ കുടിവെള്ളം വിതരണം നടത്തിയത്. നൂറുകണക്കിന് ആളുകള്‍ പങ്കെടുത്ത ഉത്സവത്തിന് ജലദൗര്‍ലഭ്യത കാരണം ക്ഷേത്ര കമ്മിറ്റി ബുദ്ധിമുട്ടുകയായിരുന്നു. ഇതുകൂടാതെ മമ്പുറത്തും പരസര പ്രദേശങ്ങളിലും സൗജന്യ കുടിവെള്ളവും കമ്മിറ്റി വിതരണം ചെയ്യുന്നുണ്ട്.