ബംഗളൂരു: ഐ.പി.എല്ലിന്റെ പ്ലേ ഓഫ് സാധ്യതകളെല്ലാം അസ്തമിച്ച റോയല്‍ ചാലഞ്ചഴ്‌സ് ബാംഗ്ലൂര്‍ ഇന്ന് രാജസ്ഥാന്‍ റോയല്‍സിനെ നേരിടും. രാത്രി എട്ടിന് ബാംഗ്ലൂരിലാണ് മത്സരം.

സീസണില്‍ 12 മത്സരങ്ങളില്‍നിന്ന് എട്ട് പോയിന്റുമയി പട്ടികയില്‍ അവസാന സ്ഥാനത്ത് നില്‍ക്കുന്ന ആര്‍.സി.ബിക്ക് ഇന്ന് ജീവന്‍മരണ പോരാട്ടമാണ്. സീസണിലെ ബാക്കി മത്സരങ്ങളെങ്കിലും ജയിച്ച് മാനം രക്ഷിക്കാനുള്ള ഒരുക്കത്തിലായിരുന്നു ആര്‍.സി.ബി. പക്ഷെ കഴിഞ്ഞ മത്സരത്തില്‍ ഡല്‍ഹിയോട് പരാജയപ്പെട്ടത് ഈ നീക്കത്തിന് തിരിച്ചടിയായി.

സമാന അവസ്ഥയിലുള്ള രാജസ്ഥാന്‍ അവസാന മത്സരം ജയിച്ചതിന്റെ ആത്മവിശ്വാസത്തിലാണ്. ബാക്കിയുള്ള മത്സരങ്ങള്‍ കൂടി ജയിച്ച് പ്ലേ ഓഫിലേക്കുള്ള വഴികള്‍ നോക്കുകയാണ് സ്മിത്തും സംഘവും. അവസാന മത്സരത്തില്‍ ഹൈദരാബാദിനെ ഏഴ് വിക്കറ്റിനായിരുന്നു രാജസ്ഥാന്‍ തകര്‍ത്ത് വിട്ടത്. സ്റ്റീവ് സ്മിത്ത് നായക സ്ഥാനം ഏറ്റെടുത്തതിന് ശേഷം രാജസ്ഥാന്‍ അല്‍പം മെച്ചപ്പെട്ട രീതിയിലാണ് മുന്നോട്ടു പോകുന്നത്.