വട്ടിയൂര്‍ക്കാവ്: രണ്ടു കിലോ കഞ്ചാവുമായി നാലാഞ്ചിറ സ്വദേശി നന്ദു, തച്ചോട്ടുകാവ് സ്വദേശി സുജിത്ത് എന്നിവര്‍ വട്ടിയൂര്‍ക്കാവ് പൊലിസിന്റെയും ഷാഡോ ടീമിന്റെയും സംയുക്ത പരിശോധനയില്‍ പിടിയിലായി.
വട്ടിയൂര്‍ക്കാവ് സ്വാഗത് നഗറില്‍ ബി.എസ്.എന്‍.എല്‍ ഓഫിസിനു സമീപം നില്‍ക്കുന്നതുകണ്ട് പൊലിസ് ചോദ്യം ചെയ്തപ്പോഴാണ് പ്രതികളുടെ കൈവശം കഞ്ചാവുണ്ടെന്ന് സൂചന ലഭിക്കുന്നത്. ലഹരിവസ്തുക്കളുടെ കൈമാറ്റത്തിന് വിവിധ കോഡുഭാഷകള്‍ ഇവര്‍ ഉപയോഗിക്കുന്നുണ്ടെന്നും കഞ്ചാവ് കൈമാറ്റം സുഗമമാക്കുന്നതിന് വാട്ട്‌സ്ആപ്പ് ഗ്രൂപ്പുകള്‍ ഉണ്ടാക്കി ഇവര്‍ സജീവമായിട്ടുണ്ടെന്നും പൊലിസിന് വിവരം ലഭിച്ചിട്ടുണ്ട്.
വട്ടിയൂര്‍ക്കാവ് എസ്.ഐ സാജുകുമാര്‍, ഷാഡോ എസ്.ഐ സുനില്‍ ലാല്‍, ഷാഡോ ടീം അംഗങ്ങള്‍ എന്നിവര്‍ ഉള്‍പ്പെട്ട സംഘം പിടികൂടിയ പ്രതികളെ കോടതിയില്‍ ഹാജരാക്കി.