ചെറുതുരുത്തി: വിവാഹ ബ്യൂറോ വഴി വിവാഹത്തിന് പേര്‍ രജിസ്റ്റര്‍ ചെയ്തിരുന്ന കേരള കലാമണ്ഡലം മുന്‍ അധ്യാപികയെ ആള്‍മാറാട്ടം നടത്തി വിവാഹം ചെയ്യുകയും, സ്വര്‍ണ്ണാഭരണങ്ങളും, പണവും തട്ടിയെടുത്ത് കൊല നടത്താന്‍ ശ്രമിക്കുകയും ചെയ്ത കേസില്‍ പൊലിസ് പിടിയിലായ എറണാംകുളം സ്വദേശിയെ വടക്കാഞ്ചേരി ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി റിമാന്റ് ചെയ്തു. വല്ലാര്‍പാടം പനമ്പുകാട് സ്വദേശി പുത്തന്‍ചിറ ഷിജു (36) ആണ് റിമാന്റിലായത്.
തിരൂരിലെ വിവാഹ ബ്യൂറോ വഴി വിവാഹത്തിന് രജിസ്റ്റര്‍ ചെയ്തിരുന്ന കലാമണ്ഡലം മുന്‍ അധ്യാപികയെ വൈശാഖന്‍ എന്ന പേരില്‍ വിവാഹം ചെയ്യുകയും പണവും ആഭരണങ്ങളും തട്ടിയെടുക്കുകയായിരുന്നു വിവാഹിതനും രണ്ട് കുട്ടികളുടെ പിതാവുമാണ് ഷിജു.
ആഭരണങ്ങളും, പണവും തട്ടിയെടുത്ത് കഴിഞ്ഞപ്പോള്‍ യുവാവ് മുന്‍ അധ്യാപികയെ ആക്രമിക്കാനും ആരംഭിച്ചു. കഴിഞ്ഞ മെയ് 17ന് അധ്യാപികയെ കട്ടിലില്‍ കെട്ടിയിട്ട പ്രതി തോര്‍ത്ത് കഴുത്തില്‍ ചുറ്റി കൊലപ്പെടുത്താന്‍ ശ്രമിച്ചു. അധ്യാപികയുടെ പ്രാണരക്ഷാര്‍ത്ഥമുള്ള നിലവിളി കേട്ട് ആളുകള്‍ ഓടികൂടിയെത്തിയപ്പോള്‍ പ്രതി ഓടിരക്ഷപ്പെട്ടു.
പൊലിസ് അന്വേഷണത്തിനൊടുവില്‍ തൃശൂര്‍ റെയില്‍വേ സ്റ്റേഷനില്‍ നിന്നാണ് വടക്കാഞ്ചേരി സി.ഐ എം.കെ സുരേഷ് കുമാറിന്റെ നേതൃത്വത്തിലുള്ള സംഘം യുവാവിനെ അറസ്റ്റ് ചെയ്തത്. പൊലിസ് ഓഫീസര്‍മാരായ കെ.എം ആനന്ദന്‍, ബ്രിജേഷ്, മനാഫ്, രാജു, രാജേഷ് എന്നിവരും പ്രതിയെ പിടികൂടിയ സംഘത്തില്‍ ഉണ്ടായി രുന്നു.