ന്യൂഡല്‍ഹി: പാര്‍ലമെന്റ് സമ്മേളനത്തിനു മുന്നോടിയായുള്ള കൊവിഡ് പരിശോധനയില്‍ സഹമന്ത്രിയുള്‍പ്പടെ 25 പാര്‍ലമെന്റംഗങ്ങള്‍ക്ക് കൊവിഡ് ബാധയുള്ളതായി കണ്ടെത്തി. റയില്‍വേ സഹമന്ത്രി സുരേഷ് അംഗാടി, ബി.ജെ.പി നേതാക്കളായ മീനാക്ഷി ലേഖി, അനന്ദ് കുമാര്‍ ഹെഗ്‌ഡെ, പര്‍വ്വേസ് സാഹിബ് സിങ്, റീത്താ ബഹുഗുണ ജോഷി, കൗശല്‍ കിഷോര്‍ തുടങ്ങി 17 ലോക്‌സഭാംഗങ്ങള്‍ക്കും രാജ്യസഭയില്‍ കോണ്‍ഗ്രസിലെ ദീപേന്ദര്‍ സിങ് ഹൂഡ, നിരന്‍ഭായ് ജെ. റാത്‌വ, ബി.ജെ.പിയുടെ അശോക് ഗസ്തി, അഭയ് ഭരദ്വാജ്, എ.ഐ.എഡി.എം.കെയുടെ നവനീത് കൃഷ്ണന്‍, എ.എ.പിയുടെ സുശീല്‍ കുമാര്‍ ഗുപ്്ത, ടി.ആര്‍.എസിന്റെ ലക്്മികാന്ത റാവു, തൃണമൂല്‍ കോണ്‍ഗ്രസിന്റെ ശാന്ത ഛേത്രി എന്നിങ്ങനെ എട്ടുപേര്‍ക്കുമാണ് കൊവിഡ് ബാധിച്ചതായി കണ്ടെത്തിയത്.
കൊവിഡ് സ്ഥിരീകരിച്ചവരില്‍ 12 പേര്‍ ബി.ജെ.പി അംഗങ്ങളാണ്. എം.പിമാരും പാര്‍ലമെന്റ് ഉദ്യോഗസ്ഥരും ഉള്‍പ്പടെ 2,500ലധികം പേരെയാണ് പരിശോധനക്ക് വിധേയമാക്കിയതെന്ന് ഐ.സി.എം.ആര്‍ അറിയിച്ചു.