ലണ്ടന്‍: ഒടുവില്‍ ക്യാപ്റ്റന്‍ വിന്‍സെന്റ് കൊംപാനിക്ക് തന്റെ യഥാര്‍ഥ ചുമതല നിര്‍വഹിക്കേണ്ടി വന്നു. നിര്‍ണായക മത്സരത്തിന്റെ 69-ാം മിനുട്ട് വരെ ലെസ്റ്റര്‍ സിറ്റിയുടെ പ്രതിരോധ പൂട്ടില്‍ വലഞ്ഞ മാഞ്ചസ്റ്റര്‍ സിറ്റിയെ 70-ാം മിനുട്ടില്‍ നേടിയ ബുള്ളറ്റ് ഗോളിലൂടെ കൊംപാനി കിരീടപ്പോരാട്ടത്തില്‍ വീണ്ടും മുന്നിലെത്തിച്ചു. ഇതോടെ 37 മത്സരത്തില്‍ നിന്ന് 31 വിജയവും രണ്ട് സമനിലയും നാല് തോല്‍വിയുമായി 95 പോയിന്റോടെ സിറ്റി ഇംഗ്ലീഷ് പ്രീമിയര്‍ ലീഗിന്റെ തലപ്പത്തേക്ക് വീണ്ടുമെത്തി.
37 മത്സരങ്ങളില്‍ നിന്ന് തന്നെ 29 വിജയവും ഏഴ് സമനിലയും ഒരു തോല്‍വിയുമടക്കം 94 പോയിന്റോടെ ലിവര്‍പൂളും തൊട്ടുപിന്നിലുണ്ട്. അടുത്ത മത്സരത്തിലെ ഇരുടീമുകളുടെയും മത്സരഫലം ഇംഗ്ലിഷ് പ്രീമിയര്‍ ലീഗിലെ ചാംപ്യന്മാരെ തീരുമാനിക്കും.

സ്വന്തം മൈതാനത്ത് വിജയത്തില്‍ കുറഞ്ഞതൊന്നും പ്രതീക്ഷിക്കാതെയാണ് മാഞ്ചസ്റ്റര്‍ സിറ്റി ലെസ്റ്ററിനെ നേരിടാനെത്തിയത്.

തോല്‍വിയോ സമനിലയോ ചാംപ്യന്മാരാകാനുള്ള സിറ്റിയുടെ വഴിയടയ്ക്കുമായിരുന്നു. ഗോള്‍രഹിതമായ ആദ്യ പകുതിയും കഴിഞ്ഞ് 70-ാം മിനുട്ടിലാണ് ഒടുവില്‍ കാത്തിരുന്ന ഗോളെത്തുന്നത്. പ്രതിരോധനിരയിലെ താരം വിന്‍സെന്റ് കൊംപാനിയുടെ തകര്‍പ്പന്‍ ഗോള്‍ ടീമിന്റെ സമ്മര്‍ദ കുറച്ചു. ഈ സീസണില്‍ കൊംപാനിയുടെ ആദ്യ ഗോളാണിത്. മത്സരത്തില്‍ 61 ശതമാനം പന്ത് കൈവശംവച്ച് കളിച്ച സിറ്റി അഞ്ച് ഷോട്ടുകള്‍ ഗോളിലേക്ക് തൊടുത്തെങ്കിലും ഒന്ന് മാത്രമാണ് ലക്ഷ്യം കണ്ടത്. ലീഗില്‍ ഒരു മത്സരം മാത്രം അവശേഷിക്കേ സീസണില്‍ മികച്ച പ്രകടനം നടത്തിയ വോള്‍വ്‌സ് ആണ് ലിവര്‍പൂളിന്റെ എതിരാളി. പതിനേഴാം സ്ഥാനത്തുള്ള ബ്രൈറ്റണിനെയാണ് സിറ്റി നേരിടേണ്ടത്.

ഞായറാഴ്ച നടക്കാനിരിക്കുന്ന മത്സരത്തില്‍ മുഹമ്മദ് സലയുടെ പരുക്ക് ലിവര്‍പൂളിന് തിരിച്ചടിയാണ്. മൂന്നാം സ്ഥാനത്തിനായി മത്സരിക്കുന്ന ചെല്‍സിക്കും ടോട്ടനത്തിനും ജയം അനിവാര്യമാണ്. ചെല്‍സി ലെസ്റ്ററിനെ നേരിടുമ്പോള്‍ എവര്‍ട്ടനാണ് ടോട്ടനത്തിന്റെ എതിരാളി. ചെല്‍സിക്ക് 71 പോയിന്റും ടോട്ടനത്തിന് 70 പോയിന്റുമാണുള്ളത്.