മുവാറ്റുപുഴ: പ്രായപൂര്‍ത്തിയാകാത്ത പെണ്‍കുട്ടിയെ തട്ടികൊണ്ട് പോയി പീഡിപ്പിച്ചകേസില്‍ പൂജാരി അറസ്റ്റില്‍. ഏനാനല്ലൂര്‍ പേരമംഗലം കുഴിക്കാലയില്‍ മനു എന്ന് വിളിക്കുന്ന മജു(37)വിനെയാണ് മുവാറ്റുപുഴ സി.ഐ സി ജയകുമാറിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
പെണ്‍കുട്ടിയുടെ വീടിനടുത്തുള്ള ദേവിക്ഷേത്രത്തിലെ പൂജാരിയായിരുന്ന മനു ഈമാസം 11ന് പെണ്‍കുട്ടി സ്‌കൂളില്‍ പോകുമ്പോള്‍ പ്രലോഭിപ്പിച്ച് തട്ടികൊണ്ട് പോകുകയായിരുന്നു. തമിഴ്‌നാട് അടക്കം വിവിധ പ്രദേശങ്ങളില്‍ ഒളിവില്‍ താമസിച്ച പ്രതിയെ മുവാറ്റുപുഴ ഡിവൈ.എസ്.പിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ മുവാറ്റുപുഴ സി.ഐയുടെ നേതൃത്വത്തിലുള്ള പൊലിസ് സംഘം രാമപുരത്തിനടുത്ത് കണിഞ്ഞി എന്ന സ്ഥലത്ത് നിന്നാണ് ഇയാളെ പിടികൂടിയത്.
ഇയാള്‍ക്ക് ഭാര്യയും രണ്ട് പെണ്‍കുട്ടികളുമുണ്ട്. പോത്താനിക്കാട് പൊലിസ് സ്റ്റേഷന്‍ പ്രിന്‍സിപ്പല്‍ എസ്.ഐ പ്രിന്‍സ് ജോസഫും എസ്.ഐ അബ്ദുല്‍ റഹ്മാനും സീനിയര്‍ സിവില്‍ പൊലിസ് ഓഫീസര്‍ എല്‍ദോസ് എന്നിവരും അന്വേഷണ സംഘത്തില്‍ ഉണ്ടായിരുന്നു.