കൊച്ചി: എറണാകുളത്ത് വന്‍ സ്വര്‍ണ കവര്‍ച്ച. എറണാകുളത്തെ സ്വകാര്യ സ്ഥാപനത്തില്‍ നിന്ന് ഇടയാറിലെ സ്ഥാപനത്തിലേക്ക് ശുദ്ധീകരിക്കാനായി കാറില്‍ കൊണ്ടുവന്ന 25 കിലോ സ്വര്‍ണമാണ് കവര്‍ന്നത്. ഇന്നലെ രാത്രി പത്ത് മണിയോടെയാണ് സംഭവം.

ആറ് കോടിയോളം വിലവരുന്ന 25 കിലോയോളം സ്വര്‍ണമാണ് കവര്‍ച്ച ചെയ്യപ്പെട്ടത്. കാറിന്റെ പിന്നിലായി ബൈക്കില്‍ എത്തിയ രണ്ടു പേരാണ് കാര്‍ ആക്രമിച്ച് സ്വര്‍ണം കവര്‍ന്ന് കടന്നത്. കാറിലുണ്ടായിരുന്നവര്‍ക്ക് ഇവരുടെ ആക്രമണത്തില്‍ പരിക്കേറ്റിട്ടുണ്ട്.

സ്വര്‍ണം എത്തുന്ന വിവരം മുന്‍കൂട്ടി അറിയാവുന്നവരാണ് കവര്‍ച്ചക്ക് പിന്നിലെന്നാണ് പൊലിസിന്റെ വിലയിരുത്തല്‍. ഇടയാറിലെ സി.ആര്‍.ജി മെറ്റലേഴ്‌സ് സ്ഥാപനത്തിലെ ജീവനക്കാരെ പൊലിസ് ചോദ്യം ചെയ്തുവരികയാണ്.

അതേസമയം സംഭവ സ്ഥലത്തെത്തിയ മാധ്യമ പ്രവര്‍ത്തകരെ ഇടയാറിലെ സ്വകാര്യ സ്ഥാപന അധികൃതര്‍ തടഞ്ഞു.