അഗളി: അട്ടപ്പാടിയില്‍ വീണ്ടും ശിശുമരണം. പുതൂര്‍ പഞ്ചായത്തിലെ പൊട്ടിക്കല്‍ ഊരിലെ മരുതന്റെയും ഉഷയും കുഞ്ഞാണ് മരിച്ചത്.
മണ്ണാര്‍ക്കാട് താലൂക്ക് ആശുപത്രിയില്‍ ചികിത്സയ്‌ക്കെത്തിയ ഉഷയുടെ നില ഗുരുതരമായതിനെ തുടര്‍ന്ന് പാലക്കാട് ജില്ലാ ആശുപത്രിയിലേക്ക് മാറ്റുന്നതിനിടെ യാത്രാ മധ്യേ ആംബുലന്‍സില്‍ പ്രസവിക്കുകയും കുട്ടി മരിക്കുകയുമായിരുന്നു.
ഏഴര മാസം ഗര്‍ഭിണിയായ ഉഷ ബുധനാഴ്ചയാണ് മണ്ണാര്‍ക്കാട് താലൂക്ക് ആശുപത്രിയില്‍ ചികിത്സക്ക് എത്തിയത്. സ്‌കാനിങ് ചെയ്യുന്നതിനിടെ അമിത രക്ത സ്രാവമുണ്ടായതിനെ തുടര്‍ന്നാണ് യുവതിയെ ജില്ലാ ആശുപത്രിയിലേക്ക് റഫര്‍ ചെയ്തത്.
ആംബുലന്‍സില്‍ നഴ്‌സിന്റെ സേവനം ഉള്‍പ്പെടെ എല്ലാ സൗകര്യങ്ങളും ഒരുക്കിയിരുന്നെങ്കിലും കുഞ്ഞിനെ രക്ഷിക്കാനായില്ല. ഉഷയുടെ മൂന്നാമത്തെ പ്രസവമാണിത്.
ശരിയായ രീതിയില്‍ മരുന്ന് കഴിക്കാത്തതും സ്‌കാനിങ് നടത്താതുമാണ് മരണ കാരണമെന്ന് പരിശോധിച്ച ഡോക്ടര്‍ പറഞ്ഞു.