തിരുവനന്തപുരം: പുറമ്പോക്ക് ഭൂമി ഭൂരഹിതര്‍ക്ക് വിതരണംചെയ്യണമെന്ന അഭിപ്രായമില്ലെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍.
അങ്ങനെ വിതരണം ചെയ്തതു കൊണ്ട് കേരളത്തിലെ ഭൂരഹിതരുടെ പ്രശ്‌നങ്ങള്‍ അവസാനിക്കില്ല. അതിന് നിയമനിര്‍മാണമാണ് വേണ്ടത്. തോട്ടം മേഖലയിലെ ഭൂമി പിടിച്ചെടുത്ത് ഭൂരഹിതരായ ആദിവാസികള്‍ക്ക് നല്‍കുന്ന കാര്യവും ഇപ്പോള്‍ എല്‍.ഡി.എഫിന്റെ പരിഗണനയിലില്ല.
തിരുവനന്തപുരം എം.എന്‍.വി.ജി അടിയോടി ഹാളില്‍ നടന്ന ദലിത് ആദിവാസി മഹാസഖ്യത്തിന്റെ നേതൃസംഗമവും രണ്ടാം ഭൂപരിഷ്‌കരണ ചര്‍ച്ചാസമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം.
ദലിത് ആദിവാസി വിഭാഗങ്ങളുടെ അവകാശ സംരക്ഷണത്തിനും അവര്‍ക്ക് അര്‍ഹതപ്പെട്ട ഭൂമി ലഭ്യമാക്കാനും സംസ്ഥാന സര്‍ക്കാര്‍ പ്രതിജ്ഞാബദ്ധമാണ്. തെരഞ്ഞെടുപ്പുകാലത്ത് പ്രകടനപത്രികയില്‍ പറഞ്ഞിരുന്ന ഭൂമിയില്ലാത്തവര്‍ക്ക് ഭൂമിയും വീടില്ലാത്തവര്‍ക്ക് വീടും എന്നത് വെറും വാഗ്ദാനമായി ശേഷിക്കാതെ നടപ്പാക്കാനാണ് സര്‍ക്കാര്‍ ശ്രമിക്കുന്നത്.
സര്‍ക്കാര്‍ 1000 ദിവസം പിന്നിട്ടതോടെ 1,07,000 പേര്‍ക്കാണ് കേരളത്തില്‍ പട്ടയം കൊടുത്തിട്ടുള്ളത്.
ലൈഫ് പദ്ധതി വഴി ഭൂമിയുള്ളവര്‍ക്ക് വീട് വച്ചുകൊടുക്കുന്നതും പുരോഗമിക്കുകയാണ്. എല്ലാവര്‍ക്കും ഭൂമി, പാര്‍പ്പിടം, വിദ്യാഭ്യാസം എന്നതിനൊപ്പം തൊഴില്‍ കൂടി ലഭ്യമാകുന്ന വികസനമാണ് നമുക്കാവശ്യമെന്നും കാനം പറഞ്ഞു.
ദലിത് ആദിവാസി മഹാസഖ്യം പ്രസിഡന്റ് പി.കെ രാജീവ് അധ്യക്ഷത വഹിച്ചു.