ജിദ്ദ: കോഴിക്കോട് വെസ്റ്റ് ഹില്‍ ചീരുവീട്ടില്‍ കോലശ്ശേരി മുഹമ്മദ് സലിം (66) സൗദി അറേബ്യയിലെ യാമ്പുവില്‍ നിര്യാതനായി. ശാരീരിക അസ്വസ്ഥതയെത്തുടര്‍ന്ന് രാവിലെ യാമ്പു ജനറല്‍ ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല.

നേരത്തെ കൊവിഡ്‌ പോസിറ്റീവ് ആയി ആശുപത്രിയില്‍ ചികിത്സ തേടുകയും രോഗമുക്തനാവുകയും ചെയ്തിരുന്നു. തുടര്‍ന്ന് കഴിഞ്ഞ ദിവസം ജോലിയില്‍ പ്രവേശിച്ചിരുന്നു. യാമ്പു പെട്രോ കെമിക്കല്‍ കമ്പനിയായ യാന്‍പെറ്റില്‍ 20 വര്‍ഷത്തെ ജോലിക്കു ശേഷം കഴിഞ്ഞ 12 വര്‍ഷമായി നാറ്റ്‌പെറ്റ് പെട്രോ കെമിക്കല്‍ കമ്പനിയില്‍ പര്‍ച്ചേസിംഗ് വിഭാഗത്തില്‍ ജോലിനോക്കുകയായിരുന്നു.

പിതാവ്: പരേതനായ റിട്ട. ഡെപ്യൂട്ടി കലക്ടര്‍ സി.കെ മൊയ്തീന്‍ കോയ. മാതാവ്: ബീവി. ഭാര്യ: ഫൗസിയ. യാമ്പു നാറ്റ്‌പെറ്റ് കമ്പനിയില്‍ തന്നെ ജോലി ചെയ്യുന്ന അസ്സാം സലിം, എറണാകുളം നെസ്റ്റില്‍ ജോലി ചെയ്യുന്ന ഷനോജ് സലിം എന്നിവര്‍ മക്കളാണ്. മരുമകള്‍: നിനു. സഹോദരങ്ങള്‍: നസീം, റസിയ, മുംതാസ്, സറീന, ജാസ്മിന്‍, തസ്‌നീം, സുഹാദ്. യാമ്പു ജനറല്‍ ആശുപത്രിയിലുള്ള മൃതദേഹം യാമ്പുവില്‍ ഖബറടക്കും.