ദമാം: സഊദിയില്‍ കിഴക്കന്‍ മേഖലയില്‍ സുരക്ഷ സേന ഭീകരരുമായി ഏറ്റുമുട്ടി. ഏറ്റുമുട്ടലില്‍ എട്ടു ഭീകരരെ സൈന്യം കൊലപ്പെടുത്തി. കിഴക്കന്‍ പ്രവിശ്യയിലെ ശീഈ മേഖലയായ ഖതീഫിലാണ് സൈന്യം ഭീകരരെ വകവരുത്തിയത്. ഇവിടെ താറൂത്തില്‍ സ്‌നാബിലാണ് ഏറ്റുമുട്ടല്‍ നടന്നത്.

ശനിയാഴ്ച രാവിലെ പത്തിന് തന്നെ സൈന്യം ഈ പ്രദേശം വളഞ്ഞിരുന്നു. തുടര്‍ന്ന് സൈനിക നടപടിയുടെ മുന്നോടിയായി ഭീകരരോട് കീഴടങ്ങാന്‍ സൈന്യം ആവശ്യപ്പെട്ടു. എന്നാല്‍ ഇത് അംഗീകരിക്കാതെ ഭീകരര്‍ സൈന്യത്തിന് നേരെ വെടിയുതിര്‍ക്കുകയായിരുന്നു. തുടര്‍ന്ന് സൈന്യം നടത്തിയ തിരിച്ചടിയിലാണ് ഭീകരര്‍ കൊല്ലപ്പെട്ടത്. സംഭവത്തില്‍ ആഭ്യന്തര മന്ത്രാലയം അന്വേഷണം ആരംഭിച്ചു.

പുതുതായി രൂപംകൊണ്ട തീവ്രവാദി സെല്‍ പ്രധാന സ്ഥാപനങ്ങള്‍, സുരക്ഷാ കേന്ദ്രങ്ങള്‍ എന്നിവ ലക്ഷ്യമിട്ടു ഭീകരപ്രവര്‍ത്തനങ്ങള്‍ നടത്താന്‍ പദ്ധതിയിട്ടു ആസൂത്രണം ചെയ്തു വരികയായിരുന്നുവെന്ന് സഊദി ആഭ്യന്തര മന്ത്രാലയത്തെ ഉദ്ധരിച്ചു സഊദി വാര്‍ത്ത ഏജന്‍സി റിപ്പോര്‍ട്ട് ചെയ്തു. സൈനിക നീക്കത്തില്‍ സുരക്ഷാ സേനാംഗങ്ങള്‍ക്കോ സമീപ വാസികള്‍ക്കോ പരിക്കേറ്റില്ലെന്നും എസ് പി എ റിപ്പോര്‍ട്ടില്‍ വ്യക്തമാക്കി.