സ്വന്തം ലേഖകന്‍
തിരുവനന്തപുരം: ഇരുചക്രവാഹന യാത്രികരെ ആകര്‍ഷിക്കുന്നതിന് കെ.എസ്.ആര്‍.ടി.സി തുടക്കമിട്ട ബസ് ഓണ്‍ ഡിമാന്റ് (ബോണ്ട്) സര്‍വിസ് കൂടുതല്‍ ഇടങ്ങളിലേക്ക്.
മധ്യകേരളത്തിലെ പുതിയ സര്‍വിസിന് ഇന്നു തുടക്കമാകും. മൂവാറ്റുപുഴയില്‍ നിന്ന് കാക്കനാട് സിവില്‍ സ്റ്റേഷന്‍ വരെയുള്ള സര്‍വിസിനാണ് ഇന്ന് തുടക്കമാകുന്നത്. കഴിഞ്ഞ ഒരുമാസത്തിനിടെ സംസ്ഥാനത്ത് ഏഴ് സര്‍വിസുകളാണ് ബസ് ഓണ്‍ ഡിമാന്റ് പദ്ധതിയനുസരിച്ച് കെ.എസ്.ആര്‍.ടി.സി തുടങ്ങിയത്.
എറണാകുളത്ത് പറവൂരില്‍ നിന്ന് അഡ്വക്കറ്റ് ജനറല്‍ ഓഫിസിലേക്കും വയനാട് ജില്ലയില്‍ പുല്‍പ്പള്ളി- കല്‍പ്പറ്റ റൂട്ടിലും മലപ്പുറത്ത് യൂനിവേഴ്‌സിറ്റി റൂട്ടിലും ആലപ്പുഴയില്‍ ചേര്‍ത്തല- ആലപ്പുഴ റൂട്ടിലും തിരുവനന്തപുരത്ത് കല്ലറ- തിരുവനന്തപുരം, തിരുവനന്തപുരം- നാഗര്‍കോവില്‍ റൂട്ടുകളിലും പാലക്കാട് ജില്ലയില്‍ പാലക്കാട്- കോയമ്പത്തൂര്‍ റൂട്ടിലുമാണ് സെപ്റ്റംബറില്‍ ബസ് ഓണ്‍ ഡിമാന്റ് പദ്ധതി തുടങ്ങിയത്. തലസ്ഥാനത്ത് പരീക്ഷണാടിസ്ഥാനത്തില്‍ നടപ്പാക്കിയ പദ്ധതി വന്‍ വിജയമായതിനെ തുടര്‍ന്നാണ് സംസ്ഥാനത്തെവിടെയും മതിയായ യാത്രക്കാരുണ്ടെങ്കില്‍ പദ്ധതി നടപ്പാക്കാന്‍ കെ.എസ്.ആര്‍.ടി.സി തീരുമാനിച്ചത്. ഇരുചക്രവാഹനങ്ങളില്‍ സ്ഥിരമായി ജോലിക്കു പോകുന്നവരെ ലക്ഷ്യമിട്ടാണ് കെ.എസ്.ആര്‍.ടി.സി ബസ് ഓണ്‍ ഡിമാന്റ് പദ്ധതി തുടങ്ങിയത്. ആവശ്യാനുസരണം കൂടുതല്‍ സര്‍വിസുകള്‍ തുടങ്ങുമെന്നും കെ.എസ്.ആര്‍.ടി.സി അറിയിച്ചിട്ടുണ്ട്.
പദ്ധതിയില്‍ ഉള്‍പ്പെടുന്നവര്‍ക്ക് 5, 10, 15, 20, 25 ദിവസങ്ങളിലേക്കുള്ള പണം മുന്‍കൂറായി അടച്ച് ബോണ്ട് ട്രാവല്‍ കാര്‍ഡുകള്‍ കൈപ്പറ്റാം. ഇതിന് 20 ശതമാനം കിഴിവുമുണ്ടാകും. യാത്രക്കാര്‍ക്ക് സീറ്റുകള്‍ ഉറപ്പായിരിക്കും. അവരവരുടെ ഓഫിസിന് മുന്നില്‍ യാത്രക്കാരെ ഇറക്കുകയും കയറ്റുകയും ചെയ്യും. ഓരോ സര്‍വിസിനും പ്രത്യേകം വാട്‌സ്ആപ്പ് ഗ്രൂപ്പും ഒരുക്കിയിട്ടുണ്ട്. ബസിന്റെ തത്സമയ ലോക്കേഷന്‍ ഗ്രൂപ്പില്‍ അറിയിക്കും. കെ.എസ്.ആര്‍.ടി.സി സ്റ്റേഷനുകളില്‍ വാഹനങ്ങള്‍ സൂക്ഷിക്കാന്‍ സൗകര്യവുമുണ്ടാകും. കൊവിഡ് സാഹചര്യത്തില്‍ പ്രത്യേകമായി അണുവിമുക്തമാക്കിയ ബസുകളാണ് ബോണ്ട് സര്‍വിസിനായി ഉപയോഗിക്കുന്നത്.