കൊല്ലം: മുള്ളുവേലിയില്‍ കുടുങ്ങി രക്ഷപ്പെടാനാവാതെ മണിക്കൂറുകള്‍ കിടന്ന പുള്ളിപ്പുലി വനംവകുപ്പ് ജീവനക്കാരെത്തിയപ്പോഴേക്കും ചത്തു.

വനം മന്ത്രി കെ. രാജുവിന്റെ മണ്ഡലത്തിലാണ് സംഭവം. ഇന്നലെ രാവിലെ 9 മണിയോടെയാണ് സംഭവം. തെന്മല വനം ഡിവിഷനിലെ ആര്യങ്കാവ് റെയ്ഞ്ചില്‍ ഇടപ്പാളയം ഫോറസ്റ്റ് സെക്ഷനില്‍ അഞ്ച് വയസോളം പ്രായമുള്ള ആണ്‍ പുലിയാണ് ചത്തത്. ഇടപ്പാളയം ഷെമീറിന്റെ എസ്റ്റേറ്റില്‍ വന്യമൃഗങ്ങള്‍ കടക്കാതിരിക്കാന്‍ നിര്‍മിച്ച കമ്പി വേലിയിലാണ് പുലി കുടുങ്ങിയത്.

രാവിലെ 5.30ന് ടാപ്പിങ് തൊഴിലാളിയാണ് കമ്പി വേലിയില്‍ കുരുങ്ങി രക്ഷപ്പെടുന്നതിനായി
പരിശ്രമിക്കുന്ന പുലിയെ കണ്ടത്. ഉടനെ സെക്ഷന്‍ ഫോറസ്റ്ററുള്‍പ്പെടെയുള്ള വനം ഉദ്യോഗസ്ഥരെ നാട്ടുകാര്‍ വിവരമറിയിച്ചു. എന്നാല്‍ മണിക്കൂറുകള്‍ വൈകി വനപാലകരെത്തിയപ്പോഴേക്കും പുലി ചത്തിരുന്നു.