ചെറുവത്തൂര്‍: ഓര്‍ക്കുളത്ത് മത്സ്യബന്ധന ബോട്ടിടിച്ചു കടത്തുബോട്ട് തകര്‍ന്നു. കടവില്‍ നിര്‍ത്തിയിട്ട സമയമായതിനാല്‍ വന്‍ അപകടം വഴിമാറി. ഇന്നലെ രാവിലെ ആറോടെയായിരുന്നു സംഭവം. ഓര്‍ക്കുളം-തൈക്കടപ്പുറം സര്‍വിസ് നടത്തുന്ന ബോട്ടാണ് തകര്‍ന്നത്.
മത്സ്യബന്ധനത്തിനു പോവുകയായിരുന്ന വലിയ ബോട്ട് ഇടിച്ചതിനെ തുടര്‍ന്ന് കടത്തുബോട്ടിന്റെ ബോട്ടിന്റെ മുകള്‍വശം തകരുകയായിരുന്നു.
തൈക്കടപ്പുറത്തുനിന്നു മടക്കര ഹാര്‍ബറിലേക്കു തൊഴിലാളികളും കാടങ്കോട് ഗവ. ഹയര്‍ സെക്കന്‍ഡറി സ്‌കൂളിലേക്കുള്ള കുട്ടികളും ഉള്‍പ്പെടെ നിരവധി പേര്‍ ആശ്രയിക്കുന്ന ബോട്ടാണിത്. പകരം സംവിധാനമില്ലാത്തതിനെ തുടര്‍ന്ന് യാത്രക്കാര്‍ നന്നേ വലഞ്ഞു. അതേസമയം മത്സ്യബന്ധന ബോട്ടുകള്‍ ഓര്‍ക്കുളം കടവ് വഴി അമിത വേഗതയില്‍ കടന്നുപോകുന്നതായും ആക്ഷേപമുണ്ട്.