സുല്‍ത്താന്‍ ബത്തേരി: രണ്ടിടങ്ങളില്‍ നിന്നായി കഞ്ചാവുമായി രണ്ടുപേരെ എക്‌സൈസ് പിടികൂടി. മുത്തങ്ങ എക്‌സൈസ് ചെക്ക്‌പോസ്റ്റിലും പുല്‍പ്പള്ളി ടൗണില്‍ നിന്നുമാണ് പ്രതികളെ പിടികൂടിയത്.
മുത്തങ്ങ എക്‌സൈസ് ചെക്ക്‌പോസ്റ്റില്‍ സുല്‍ത്താന്‍ ബത്തേരി ദൊട്ടപ്പന്‍കുളം പുതിയവീട്ടില്‍ ദിലീപ്കുമാര്‍(35)ആണ് അധികൃതരുടെ വലയിലായത്. വാഹന പരിശോധനക്കിടെ എക്‌സൈസിനെ കബളിപ്പിച്ചു കാല്‍നടയായി കഞ്ചാവുകടത്താന്‍ ശ്രമിക്കവേയാണ് ഇന്നലെ വൈകിട്ട് ഇയാളെ പിടികൂടിയത്.
ഇയാളില്‍ നിന്ന് 100 ഗ്രാം കഞ്ചാവും പിടിച്ചെടുത്തിട്ടുണ്ട്. നഞ്ചന്‍കോട് നിന്നുമാണ് കഞ്ചാവ് കൊണ്ടുവരുന്നതെന്നാണ് ചോദ്യം ചെയ്യിലില്‍ പിടിയിലായ ദിലീപ്കുമാര്‍ പറഞ്ഞതെന്ന് എക്‌സൈസ് അധികൃതര്‍ അറിയിച്ചു.
പുല്‍പ്പള്ളി പാടിച്ചിറ ശശിമല സ്വദേശിയായ കിഴക്കേടത്തു വീട്ടില്‍ മോന്‍സി (38)യെയാണ് ബത്തേരി റെയ്ഞ്ച് അസി. എക്‌സൈസ് ഇന്‍സ്‌പെക്ടര്‍ വി.ആര്‍ ജനാര്‍ദനന്‍ പുല്‍പ്പള്ളി ടൗണില്‍ വച്ചു കസ്റ്റഡിയിലെടുത്തത്. ഇയാളില്‍ നിന്ന് 200 ഗ്രാം കഞ്ചാവും പിടിച്ചെടുത്തിട്ടുണ്ട്. പുല്‍പ്പള്ളി ടൗണിലും പരിസരങ്ങളിലും കഞ്ചാവ് വില്‍ക്കുന്നയാളെന്ന് എക്‌സൈസ് അധികൃതര്‍ പറഞ്ഞു.
ഇരുവരേയും പിന്നീട് കോടതിയില്‍ ഹാജരാക്കി. മുത്തങ്ങയില്‍ പരിശോധനയില്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ സി ശരത് ബാബു, പി.ഇ .ഒമാരായ വി.ആര്‍ ബാബുരാജ്, പി.കെ പ്രഭാകരന്‍, സി.ഇ.ഒമാരായ കെ ജോണി, സി.ഡി സാബു എന്നിവരും പുല്‍പ്പള്ളിയില്‍ ഇന്റലിജന്‍സ് പ്രിവന്റീവ് ഓഫിസര്‍ എം.കെ ഗോപി, പ്രിവന്റീവ് ഓഫിസര്‍ കെ.ജി ശശികുമാര്‍, സിവില്‍ എക്‌സൈസ് ഓഫിസര്‍മാരായ എം.കെ ഹരിദാസന്‍, ജോഷി തുമ്പാനം, എ.എസ് അനീഷ്, കെ.കെ അനില്‍കുമാര്‍, റഹീം എന്നിവര്‍ പങ്കെടുത്തു.