ഗൂഡല്ലൂര്‍: നീലഗിരി ജില്ലയിലെ ഗൂഡല്ലൂര്‍, പന്തല്ലൂര്‍ താലൂക്കുകളില്‍ ഇത്തവണ വേനല്‍ മഴ ലഭിക്കാത്തത് തിരിച്ചടിയാകുന്നു. ഊട്ടി, കോത്തഗിരി, കുന്നൂര്‍ താലൂക്കുകളെ അപേക്ഷിച്ച് ഗൂഡല്ലൂര്‍, പന്തല്ലൂര്‍ താലൂക്കുകളില്‍ മഴയുടെ അളവില്‍ കാര്യമായ കുറവാണുണ്ടായിരിക്കുന്നത്.
മഴ ലഭിക്കാതായതോടെ പ്രദേശത്തെ തോടുകളും പുഴകളും വറ്റിവരണ്ട നിലയിലാണ്. കിണറുകള്‍ വറ്റിയതോടെ കുടിവെള്ള ക്ഷാമവും രൂക്ഷമായിരിക്കുകയാണ്. പുഴകള്‍ വറ്റിയത് തദ്ദേശ സ്ഥാപനങ്ങളുടെ കുടിവെള്ള പദ്ധതികളേയും കാര്യമായി ബാധിച്ചിട്ടുണ്ട്.
ഗൂഡല്ലൂര്‍, പന്തല്ലൂര്‍ താലൂക്കുകളിലെ പ്രധാന കാര്‍ഷിക വിളയായ തേയിലത്തോട്ടത്തില്‍ വേണ്ടത്ര മഴ ലഭിക്കാത്തതിനാല്‍ ഉല്‍പാദനം ഗണ്യമായി കുറഞ്ഞിരിക്കുകയാണ്.
ചില പ്രദേശങ്ങളില്‍ ചെടികള്‍ കരിഞ്ഞുണങ്ങിയിട്ടുണ്ട്. വേനല്‍ ശക്തമായതോടെ തേയില ചെടികള്‍ക്ക് ഭീഷണിയായ റെഡ് സ്‌പൈഡര്‍ എന്ന കീടത്തിന്റെ ആക്രമണം വ്യാപിച്ചതും കര്‍ഷകര്‍ക്ക് തിരിച്ചടിയായിട്ടുണ്ട്.