ന്യൂഡല്‍ഹി: ഉത്തര്‍പ്രദേശിലെ ഹാത്രസില്‍ റിപ്പോര്‍ട്ടിങ്ങിനെത്തിയ മലയാളി മാധ്യമപ്രവര്‍ത്തകനെതിരെ യു.എ.പി.എ ചുമത്തിയ നടപടിയില്‍ കേന്ദ്രസര്‍ക്കാരിനെതിരെ രൂക്ഷവിമര്‍ശനവുമായി മുതിര്‍ന്ന കോണ്‍ഗ്രസ് നേതാവ് കപില്‍ സിബല്‍. എതിര്‍ശബ്ദങ്ങളെ ഇല്ലാതാക്കാന്‍ മോദി ഈ നിയമം ഉപയോഗിക്കുമെന്ന് താന്‍ പറഞ്ഞതാണെന്ന് അദ്ദേഹം ഓര്‍മിപ്പിച്ചു. സ്വാതന്ത്ര്യമാണ് ഇന്ത്യന്‍ ജനതക്കു വേണ്ടതെന്നും അല്ലാതെ അതിനു മുമ്പത്തെ രാജഭരണമല്ലെന്നും അദ്ദേഹം വ്യക്തമാക്കി.

'മാധ്യമപ്രവര്‍ത്തകര്‍ക്കെതിരെ യു.എ.പി.എ ചുമത്തി യിരിക്കുന്നു. ഹാത്രസിലെത്തിയതിന് പിന്നില്‍ ഗൂഢാലോചനയെന്ന് ആരോപിച്ചാണ് ഇത്. രാജ്യസഭയിലെ ചര്‍ച്ചയില്‍ ഇടപെട്ട് സംസാരിക്കവെ യു.എ.പി.എ നമുക്കിടയില്‍ തന്നെ ഉള്ളവരെ ഉന്നംവെക്കാന്‍ ഉപയോഗിക്കുമെന്ന് ഞാന്‍ പറഞ്ഞതാണ്. നമുക്ക് വേണ്ടത് സ്വാതന്ത്ര്യമാണ്, അതിനുമുമ്പുള്ള ഭരണക്രമമല്ല'- കപില്‍ സിബല്‍ ട്വീറ്റ് ചെയ്തു.

കഴിഞ്ഞദിവസമാണ് ഹാത്രസില്‍ റിപ്പോര്‍ട്ടിങ്ങിനെത്തിയ മലയാളി മാധ്യമപ്രവര്‍ത്തകനും കെ.യു.ഡബ്ല്യു.ജെ ഡല്‍ഹി യൂണിറ്റ് സെക്രട്ടറിയുമായ സിദ്ദീഖ് കാപ്പനെതിരെ രാജ്യദ്രോഹകുറ്റം ചുമത്തി യു.പി പൊലിസ് കേസെടുത്തത്. മതവിദ്വേഷം വളര്‍ത്തിയെന്നാരോപിച്ചാണ് കേസ് എടുത്തിരിക്കുന്നത്. മാധ്യമപ്രവര്‍ത്തകനാണെന്നു പറഞ്ഞിട്ടും സിദ്ദീഖിനെ അറസ്റ്റു ചെയ്യുകയും ലാപ്ടോപ്പ് അടക്കമുള്ളവ പിടിച്ചെടുക്കുകയുമായിരുന്നു.

അഴിമുഖം.കോമിലെ മാധ്യമപ്രവര്‍ത്തകനായ സിദ്ദീഖ് മുമ്പ് തേജസ്, തത്സമയം ദിനപത്രങ്ങളുടെയും ലേഖകനായിരുന്നു. ക്യാമ്പസ് ഫ്രണ്ട് ഭാരവാഹികളായ മൂന്നു പേരെയും സിദ്ദീഖിനൊപ്പം യു.പി പൊലിസ് അറസ്റ്റ് ചെയ്തിരുന്നു.