ജിദ്ദ: സഊദിയിൽ നിന്നു നാടുകടത്തല്‍ കേന്ദ്രത്തില്‍ കഴിഞ്ഞവരുടെ മൂന്നാമത്തെ സംഘം നാട്ടിലേക്ക് മടങ്ങി. റിയാദില്‍ നിന്നുള്ള സംഘമാണ് രണ്ട് വിമാനങ്ങളിലായി നാട്ടിലേക്ക് മടങ്ങിയത്. ഡല്‍ഹി, ലക്‌നൗ വിമാനത്താവളങ്ങളിലേക്കാണ് അറുന്നൂറോളം വരുന്ന സംഘം യാത്രയായത്.
അതേ സമയം തര്‍ഹീലില്‍നിന്ന് ഇനി നാട്ടിലേത്തിക്കാനുളളത് 559 പേരെയാണെന്ന് ഇന്ത്യന്‍ എംബസി പത്രക്കുറിപ്പില്‍ അറിയിച്ചു.
ഇവരില്‍ 419 പേര്‍ റിയാദിലും 140 പേര്‍ ജിദ്ദ തര്‍ഹിലീലുമാണുള്ളത്. സഊദി അധികൃതരുമായി ബന്ധപ്പെട്ട് ഇവരെ എത്രയും പെട്ടെന്ന് നാട്ടിലെത്തിക്കാനുളള ശ്രമത്തിലാണ് എംബസിയും ജിദ്ദ കോണ്‍സുലേറ്റും.
എന്നാൽ ക്വാറന്റൈന്‍ സംബന്ധിച്ച വ്യക്തത ലഭിക്കാത്തതിനാല്‍ മലയാളികള്‍ ഉള്‍പ്പെടെയുള്ള കേരളത്തിലേക്കുള്ള സംഘത്തിന്റെ യാത്ര നീളാണ് കാരണം.
സഊദി എയര്‍ ലൈന്‍സിന്റെ രണ്ട് വിമാനങ്ങളിലാണ് സംഘം കഴിഞ്ഞ ദിവസം യാത്രയായത്. റിയാദ് തര്‍ഹീലില്‍ കഴിഞ്ഞിരുന്ന 575 പേരാണ് നാട്ടിലേക്ക് മടങ്ങിയത്. ഡല്‍ഹിയിലേക്കുള്ള വിമാനത്തില്‍ 335 പേരും. ലക്‌നൗവിലേക്കുള്ള വിമാനത്തില്‍ 245 പേരും യാത്രയായി. ഇതോടെ കഴിഞ്ഞ ഒരു മാസത്തിനിടെ റിയാദ് ജിദ്ദ നാട് കടത്തല്‍ കേന്ദ്രങ്ങളില്‍ നിന്നായി 1162 പേര്‍ നാടണഞ്ഞു.
റിയാദ്, ജിദ്ദ, ദമ്മാം നാടുകടത്തല്‍ കേന്ദ്രങ്ങളില്‍ ഇനിയും നൂറുകണക്കിന് പേര്‍ നാടണയുന്നതിന് ഊഴം കാത്ത് കഴിയുന്നുണ്ട്. കൊവിഡ് പ്രതിസന്ധിയെ തുടര്‍ന്ന് ജോലി നഷ്ടപ്പെട്ടവരും താമസ രേഖ കാലാവധി കഴിഞ്ഞവരുമായ നിരവധി പേര്‍ നാട്ടിലേക്ക് മടങ്ങാന്‍ ആഗ്രഹിച്ച തര്‍ഹീലുകളെ സമീപിക്കുന്നതും തുടരുന്നുണ്ട്.
അതിനിടെ സഊദിയ എയര്‍ലൈന്‍സ്, ജനറല്‍ അതോറിറ്റി ഓഫ് സിവില്‍ ഏവിയേഷന്‍ (ജി.എ.സി.എ), ദല്‍ഹി, ഉത്തര്‍പ്രദേശ്, തമിഴ്‌നാട്, തെലങ്കാന സംസ്ഥാന സര്‍ക്കാരുകള്‍ എന്നിവര്‍ നല്‍കിയ സഹകരണത്തെ എംബസി പത്രക്കുറിപ്പില്‍ പ്രകീര്‍ത്തിച്ചു.