സുല്‍ത്താന്‍ ബത്തേരി: സംസ്ഥാനത്തെ ആദ്യത്തെ ഇ.വി.എം വിവിപാറ്റ് വെയര്‍ഹൗസ് ഉദ്ഘാടനം ചെയ്തു. വിഡിയോ കോണ്‍ഫറന്‍സിലൂടെ സംസ്ഥാന മുഖ്യ തെരഞ്ഞെടുപ്പ് കമ്മിഷനര്‍ ടിക്കാറാം മീണയാണ് വെയര്‍ഹൗസ് ഉദ്ഘാടനം ചെയ്തത്.
തെരഞ്ഞെടുപ്പില്‍ മാതൃകാപരമായ പ്രവര്‍ത്തനമാണ് വയനാട് ജില്ല കാഴ്ചവച്ചതെന്നും പിന്നോക്ക ജില്ലയായ വയനാട്ടില്‍ കെട്ടിട നിര്‍മാണം പൂര്‍ത്തീകരിച്ചതിലൂടെ എന്തും ഇവിടെ നടപ്പാക്കാമെന്ന് തെളിയിച്ചതായും അദ്ദേഹം പറഞ്ഞു. സംസ്ഥാനത്ത് ആദ്യമായിട്ടാണ് തെരഞ്ഞെടുപ്പ് കമ്മിഷന്‍ സ്വന്തമായി ഇ.വി.എം വിവിപാറ്റ് വെയര്‍ ഹൗസ് നിര്‍മിച്ചിരിക്കുന്നത്. സുല്‍ത്താന്‍ ബത്തേരി മിനി സിവില്‍സ്റ്റേഷന് സമീപം 8156 സ്‌ക്വയര്‍ ഫീറ്റില്‍ ഒരു കോടി 42 ലക്ഷം രൂപ ചെലവിലാണ് ഇരുനില കെട്ടിടം പൂര്‍ത്തിയാക്കിയത്.
നാലായിരത്തോളം ഇ.വി.എം വിവിപാറ്റ് യന്ത്രങ്ങള്‍ ഇവിടെ സൂക്ഷിക്കാം. ചടങ്ങില്‍ ജില്ലാ കലക്ടര്‍ എ.ആര്‍ അജയകുമാര്‍ ഐ.എ.എസ് അധ്യക്ഷനായി. സബ് കലക്ടര്‍ എന്‍.എസ്.കെ ഉമേഷ്, ജനില്‍കുമാര്‍, കെ.എ തോമസ്, രോഷണി നാരായണന്‍, കെ. സുനില്‍കുമാര്‍, വി. അബൂബക്കര്‍, എന്‍. റംല സംസാരിച്ചു.