തലശ്ശേരി: തലശ്ശേരി ജുവനൈല്‍ ഹോമിനോടനുബന്ധിച്ചുള്ള ഒബ്‌സര്‍വേഷന്‍ ഹോമില്‍ നിന്നു രക്ഷപ്പെട്ട രണ്ടു കുട്ടികള്‍ പിടിയില്‍. ഇതില്‍ ഒരു കുട്ടിയെ സുരക്ഷാകാരണങ്ങള്‍ പരിഗണിച്ചു ഇന്നലെ തൃശൂര്‍ ഒബ്‌സര്‍വേഷന്‍ ഹോമിലേക്ക് മാറ്റി.
കഴിഞ്ഞ നാലിന് അര്‍ധരാത്രിയായിരുന്നു കുട്ടികുറ്റവാളികള്‍ രക്ഷപ്പെട്ടത്. കൊലക്കേസ് പ്രതിയായ കൂത്തുപമ്പ് സ്വദേശിയായ പതിനേഴുകാരനും മോഷണക്കേസ് പ്രതിയായ പുളിങ്ങോം സ്വദേശിയായ പതിനേഴുകാരനുമാണ് രക്ഷപ്പെട്ടത്.
ഇവരെ കാണാതായി ചുരുങ്ങിയ സമയത്തിനുള്ളില്‍ തന്നെ ഒബ്‌സര്‍വേഷന്‍ ഹോം അധികൃതര്‍ പൊലിസില്‍ പരാതി നല്‍കിയിരുന്നു. ഇതു രക്ഷപ്പെട്ടവരെ കണ്ടെത്താന്‍ സഹായകരമായി.
രക്ഷപ്പെട്ട പുളിങ്ങോം സ്വദേശി വീട്ടിലെത്തി വസ്ത്രങ്ങളെടുത്തിരുന്നു. പിന്നീട് വീട്ടുകാര്‍ തന്നെ കുട്ടിയെ കണ്ടെത്തി പൊലിസില്‍ ഏല്‍പ്പിക്കുകയായിരുന്നു.
കൊലക്കേസ് പ്രതിയായ പാറോല്‍പ്പള്ളി സ്വദേശി നാട്ടിലെത്തിയപ്പോള്‍ നാട്ടുകാര്‍ പിടികൂടി പൊലിസില്‍ ഏല്‍പ്പിച്ചു. പുളിങ്ങോം സ്വദേശിയെയാണ് തൃശൂരിലേക്ക് മാറ്റിയത്.