സ്വന്തം ലേഖകന്‍

തിരുവനന്തപുരം: സംസ്ഥാനത്തെ ബാറുകളും ബിയര്‍ - വൈന്‍ പാര്‍ലറുകളും ഉടന്‍ തുറക്കേണ്ടെന്ന്   മുഖ്യമന്ത്രി വിളിച്ച ഉന്നതതല യോഗത്തില്‍ തീരുമാനം. ഇപ്പോള്‍ ബാറുകള്‍ തുറന്നാല്‍ രോഗവ്യാപനത്തിനു കാരണമായേക്കുമെന്ന ആരോഗ്യ വകുപ്പിന്റെ ആശങ്ക കണക്കിലെടുത്താണ് സര്‍ക്കാര്‍ തീരുമാനം. എക്‌സൈസ് മന്ത്രി, കമ്മിഷണര്‍, ബിവറേജസ് കോര്‍പറേഷന്‍ എം.ഡി, നികുതി വകുപ്പ് സെക്രട്ടറി,സംസ്ഥാന പൊലിസ് മേധാവി, ആരോഗ്യവകുപ്പ് സെക്രട്ടറി എന്നിവര്‍ പങ്കെടുത്ത യോഗത്തിലാണ് ഇപ്പോള്‍ ബാറുകള്‍ തുറക്കേണ്ടെന്ന തീരുമാനം എടുത്തത്. 

ഈ ഘട്ടത്തില്‍ ബാറുകള്‍ തുറക്കുന്നത് കൊവിഡ് വ്യാപനത്തിനു കാരണമാകുമെന്നു ആരോഗ്യവകുപ്പ് യോഗത്തെ അറിയിച്ചു. മാത്രമല്ല,  സമ്പര്‍ക്കം വ്യാപനവും അതിരൂക്ഷമായി തുടരുകയാണ്. ബാറുകളില്‍  സാമൂഹിക അകലം പാലിക്കുന്നുണ്ടെന്ന് ഉറപ്പുവരുത്തുക പ്രയാസമാണെന്നു പൊലിസും യോഗത്തെ അറിയിച്ചു. ഇതെല്ലാം പരിഗണിച്ച് കൊവിഡ് കണക്കുകളില്‍ കുറവു വരുന്നതുവരെ നിലവിലെ സ്ഥിതി തുടരട്ടെയെന്നു മുഖ്യമന്ത്രി യോഗത്തെ അറിയിച്ചു. 

ഇതര സംസ്ഥാനങ്ങളില്‍ ബാറുകള്‍ തുറന്നപ്പോള്‍ സംസ്ഥാനത്തും തുറക്കണമെന്നാവശ്യപ്പെട്ട് ബാര്‍ ഓണേഴ്‌സ് അസോസിയേഷന്‍ സര്‍ക്കാരിനെ സമീപിച്ചിരുന്നു. മാനദണ്ഡങ്ങള്‍ പാലിച്ച് ഇവ തുറക്കാമെന്നു കാണിച്ച് എക്‌സൈസ് കമ്മിഷണര്‍ നല്‍കിയ ഫയല്‍ എക്‌സൈസ് മന്ത്രി നേരത്തെ മുഖ്യമന്ത്രിക്ക് കൈമാറിയിരുന്നു. കൂടാതെ ബാറുകളിലൂടെയുള്ള കൗണ്ടര്‍ വില്‍പന അവസാനിപ്പിക്കണമെന്ന് ബെവ്‌കോയും ആവശ്യപ്പെട്ടിരുന്നു. ബാറുകളില്‍ കൗണ്ടര്‍ വില്‍പന ആരംഭിച്ചതോടെ വലിയ നഷ്ടമാണ് ബെവ്‌കോയ്ക്ക് ഉണ്ടാകുന്നത്. 

മിക്ക ബാറുകളിലും ടോക്കണില്ലാതെയാണു വില്‍പന. കഴിഞ്ഞ ഓണക്കാലത്ത് ബെവ്‌കോ ഔട്ട്‌ലെറ്റുകളിലൂടെയുള്ള മദ്യവില്‍പന കുത്തനെ കുറഞ്ഞിരുന്നു.  ഇതെല്ലാം പരിഗണിച്ചാണ് ഇക്കാര്യം ചര്‍ച്ച ചെയ്യാന്‍ മുഖ്യമന്ത്രി ഇന്നലെ ഉന്നതതലയോഗം വിളിച്ചത്.