കല്‍പ്പറ്റ: പതിനേഴാം ലോക്‌സഭാ തെരഞ്ഞെടുപ്പില്‍ താരമായി നോട്ട. വിയോജിപ്പ് രേഖപ്പെടുത്താന്‍ തെരഞ്ഞെടുപ്പ് കമ്മിഷന്‍ ഇലക്ട്രോണിക് വോട്ടിങ് മെഷീനില്‍ ഉള്‍പ്പെടുത്തിയ നോട്ട(നണ്‍ ഓഫ് ദി എബോ)ക്ക് ഇത്തവണ സംസ്ഥാനത്ത് ലഭിച്ചത് 1,03,596 വോട്ടുകള്‍.

20 മണ്ഡലങ്ങളിലായാണ് ഇത്രയും വോട്ടുകള്‍ ലഭിച്ചത്. ആലത്തൂരിലാണ് നോട്ടക്ക് ഏറ്റവും കൂടുതല്‍ വോട്ടുള്ളത്. ഇവിടെ 7722 വോട്ടുകളാണ് നോട്ടക്ക് ലഭിച്ചത്. രണ്ടാമതുള്ള ചാലക്കുടിയില്‍ 7578 വോട്ടുകളും കോട്ടയത്ത് 7191 വോട്ടുകളും നോട്ടക്ക് ലഭിച്ചു.

പതിമൂന്ന് മണ്ഡലങ്ങളില്‍ പ്രധാന മുന്നണി സ്ഥാനാര്‍ഥികള്‍ക്ക് പിന്നില്‍ നാലാം സ്ഥാനത്താണ് നോട്ട. കാസര്‍കോട്, തൃശൂര്‍, ഇടുക്കി, മാവേലിക്കര, ആറ്റിങ്ങല്‍, കോഴിക്കോട്, പാലക്കാട്, ചാലക്കുടി, തിരുവനന്തപുരം, ആലത്തൂര്‍, എറണാകുളം, ആലപ്പുഴ, കൊല്ലം മണ്ഡലങ്ങളിലാണ് നോട്ട നാലാമതെത്തിയത്.

മലപ്പുറം, വടകര, പത്തനംതിട്ട, കോട്ടയം, കണ്ണൂര്‍ എന്നിവിടങ്ങളില്‍ അഞ്ചാം സ്ഥാനത്താണ് നോട്ട. 20 സ്ഥാനാര്‍ഥികളുണ്ടായിരുന്ന വയനാട്ടില്‍ 2155 വോട്ടുകള്‍ ലഭിച്ച നോട്ട പത്താം സ്ഥാനത്തും പൊന്നാനിയില്‍ ആറാം സ്ഥാനത്തുമാണ്.
ഭൂരിഭാരം മണ്ഡലങ്ങളിലും സ്വതന്ത്ര സ്ഥാനാര്‍ഥികള്‍ നോട്ടക്ക് പിന്നിലാണ്. വയനാട്ടിലാണ് നോട്ടക്ക് ഏറ്റവും കുറവ് വോട്ട് ലഭിച്ചത്.