തലശ്ശേരി: പ്രളയത്തിനുശേഷം എലിപ്പനിക്കെതിരേ കേരളം നടത്തിയ മുന്‍കരുതല്‍ ലോകത്തിനു തന്നെ മാതൃകയാണെന്നു മന്ത്രി കെ.കെ ശൈലജ. തലശ്ശേരി ജനറല്‍ ആശുപത്രിയുടെ നവീകരിച്ച ബ്ലോക്ക് ഉദ്ഘാടനം ചെയ്യുകയായിരുന്നു മന്ത്രി. രോഗം വന്നിട്ട് ചികിത്സ നടത്തുന്നതിനെക്കാള്‍ രോഗം വരാതെ നോക്കാനാണു നമ്മള്‍ ശ്രമിച്ചത്. അതില്‍ പ്രതീക്ഷിച്ചതിനെക്കാള്‍ വിജയം കൈവരിക്കാനായി. സര്‍ക്കാര്‍ ആശുപത്രികളില്‍ രോഗികളോട് സ്‌നേഹത്തോടെ പെരുമാറ്റം ഉണ്ടാവണമെന്നും തിരിച്ച് രോഗികളും കൂട്ടിരിപ്പുകാരും ഇതേ മനോഭാവം പുലര്‍ത്തണമെന്നും മന്ത്രി വ്യക്തമാക്കി.
ദേശീയ ആരോഗ്യമിഷന്റെ 40 ലക്ഷം രൂപ ചെലവഴിച്ച് നവീകരിച്ച മെഡിക്കല്‍ ഐ.സി.യു, നഗരസഭ അനുവദിച്ച 24 ലക്ഷം ചിലവഴിച്ച് നവീകരിച്ച സര്‍ജിക്കല്‍ വാര്‍ഡ് (പുരുഷന്മാര്‍), സംസ്ഥാനത്തെ ആദ്യത്തെ ശീതീകരിച്ച പോസ്റ്റ് ഓപ്പറേറ്റീവ് വാര്‍ഡ് (ഗൈനക്) എന്നിവയുടെ ഉദ്ഘാടനവും മന്ത്രി നിര്‍വഹിച്ചു. എ.എന്‍ ഷംസീര്‍ എം.എല്‍.എ അധ്യക്ഷനായി. നഗരസഭാ ചെയര്‍മാന്‍ സി.കെ രമേശന്‍, ഉപാധ്യക്ഷ നജ്മാ ഹാഷിം, ടി. രാഘവന്‍, ടി.എം റുബ്‌സീന, ഡി.എം.ഒ ഡോ. നാരായണനായിക്, ഡോ. കെ.വി ലതീഷ്, ഡോ. എം. പിയൂഷ് നമ്പൂതിരിപ്പാട് പങ്കെടുത്തു.