ന്യൂഡല്‍ഹി: കേരളത്തിലെ സംഘടനാ തെരഞ്ഞെടുപ്പ് പൂര്‍ത്തിയാകുന്നതുവരെ എം.എം ഹസന്‍ കെ.പി.സി.സി പ്രസിഡന്റായി തുടരുമെന്ന് സംസ്ഥാനത്തിന്റെ ചുമതലയുള്ള എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക്ക് അറിയിച്ചു. സുധീരന്‍ രാജിവച്ചതിനെ തുടര്‍ന്ന് ഹസന് പ്രസിഡന്റിന്റെ ചുമതല നല്‍കിയിരുന്നു.
കേരളത്തിലെ സംഘടനാ തെരഞ്ഞെടുപ്പ് പൂര്‍ത്തിയാകുന്നതുവരെ ഹസന്‍ ഈ ചുമതലയില്‍ തുടരും. എ.ഐ.സി.സിയുടെ തീരുമാനം ഇതാണ്- മുകുള്‍ വാസ്‌നിക് പറഞ്ഞു. മാര്‍ച്ച് 25ന് ഹസന് പ്രസിഡന്റിന്റെ ചുമതല നല്‍കിയ പ്രഖ്യാപനം നടത്തിയപ്പോള്‍ മലപ്പുറം ലോക്‌സഭ ഉപതെരഞ്ഞെടുപ്പ് പൂര്‍ത്തിയാകുന്നതുവരെ തുടരുമെന്നായിരുന്നു എ.ഐ.സി.സി വ്യക്തമാക്കിയിരുന്നത്.
ഇതിനു ശേഷം വിപുലമായ ചര്‍ച്ചകള്‍ക്ക് ഒടുവില്‍ തീരുമാനം എന്നതായിരുന്നു ധാരണ. ആ ധാരണയുടെ അടിസ്ഥാനത്തില്‍ ഉപതെരഞ്ഞെടുപ്പിന് ശേഷം കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധി മുതിര്‍ന്ന നേതാക്കളുമായി വിശദമായ ആശയവിനിമയം നടത്തി.
ഇന്നലെ വൈകിട്ട് തിരുവനന്തപുരത്ത് യു.ഡി.എഫ് യോഗം നടക്കുന്നതിനിടെ മുകുള്‍ വാസ്‌നിക് തന്നെ ഉമ്മന്‍ചാണ്ടി, രമേശ് ചെന്നിത്തല, വി.എം.സുധീരന്‍ എന്നിവരെ ടെലിഫോണില്‍ വിളിച്ച് എ.ഐ.സി.സി തീരുമാനം അറിയിച്ചു. ഇതിന് ശേഷം എം.എം.ഹസനെയും ഫോണില്‍ വിളിച്ചു. പിന്നാലെയാണ് മുകുള്‍ വാസ്‌നിക് മാധ്യമങ്ങളെ കണ്ടത്.