ബെര്‍ലിന്‍: രണ്ട് വര്‍ഷത്തെ ഇടവേളകള്‍ക്ക് ശേഷം ജര്‍മന്‍ കപ്പ് വീണ്ടും ബയേണ്‍ മ്യൂണിക്കിന് സ്വന്തം. ഫൈനലില്‍ ആര്‍.ബി ലെയ്പ്‌സിഗിനെ എതിരില്ലാത്ത മൂന്ന് ഗോളുകള്‍ക്ക് പരാജയപ്പെടുത്തിയാണ് ബയേണ്‍ ജര്‍മന്‍ കപ്പ് നേടിയെടുത്തത്. കഴിഞ്ഞ വര്‍ഷം ഫൈനലില്‍ ഫ്രാങ്ക്ഫര്‍ട്ടിന് മുന്‍പില്‍ 3-1ന് തകര്‍ന്നടിഞ്ഞ ബയേണ്‍ ഇത്തവണ തകര്‍പ്പന്‍ പ്രകടനമാണ് പുറത്തെടുത്തത്. മോശം തുടക്കത്തിന് ശേഷം ശക്തരായി തിരിച്ചുവന്ന് ബുണ്ടസ്‌ലിഗ കിരീടം നേടിയ ബയേണിന് ജര്‍മന്‍ കപ്പ് കിരീടനേട്ടം ഇരട്ടിമധുരം നല്‍കുന്നതാണ്.
സൂപ്പര്‍ താരം ലെവന്‍ഡോസ്‌കിയുടെ ഇരട്ട ഗോളുകളാണ് ബയേണിന് അനായാസവിജയം സമ്മാനിച്ചത്. 29, 85 മിനുട്ടുകളിലാണ് താരം വലചലിപ്പിച്ചത്. കിങ്സ്ലി കോമന്‍ (78ാംമിനുട്ട്) ബയേണിന്റെ ഗോള്‍പട്ടിക പൂര്‍ത്തിയാക്കി.
ജര്‍മന്‍ കപ്പ് ഏറ്റവും കൂടുതല്‍ സ്വന്തമാക്കിയ ടീമാണ് ബയേണ്‍ മ്യൂണിക്. 19 തവണയാണ് ബയേണ്‍ ഈ കപ്പ് സ്വന്തമാക്കിയത്. കിരീട നേട്ടത്തില്‍ രണ്ടാമതുള്ള വെര്‍ഡര്‍ ബ്രെമന് ആറ് തവണയാണ് ജര്‍മന്‍ കപ്പ് നേടാനായത്. 12ാം തവണയാണ് ബയേണ്‍ സീസണില്‍ ഇരട്ട കിരീടം നേടുന്നത്.കിരീടനേട്ടം ബയേണ്‍ സൂപ്പര്‍ താരങ്ങളായ ഫ്രാങ്ക് റിബറിക്കും ആര്യന്‍ റോബനും റാഫീഞ്ഞക്കുമുള്ള ഗംഭീര യാത്രയയപ്പും കൂടിയായി. ഈ സീസണിനു ശേഷം ബയേണ്‍ വിടുമെന്ന് നേരത്തെ ഇരുവരും പ്രഖ്യാപിച്ചിരുന്നു. 2015-2016 സീസണിലാണ് ബയേണ്‍ അവസാനമായി ജര്‍മന്‍ കപ്പ് സ്വന്തമാക്കിയത്.