മദീന: പ്രവാചക പള്ളിയായ മദീനയില്‍ റമദാനിന്റെ ആദ്യ പകുതിവരെ തറാവീഹ് നിസ്‌കാരത്തില്‍ പങ്കെടുത്ത വിശ്വാസികളുടെ എണ്ണം വെളിപ്പെടുത്തി അധികൃതര്‍. ഇതിനോടകം 32 ലക്ഷം വിശ്വാസികള്‍ തറാവീഹ് നിര്‍വഹിക്കാന്‍ എത്തിയെന്നാണ് ഇരു ഹറം കാര്യാലയ വകുപ്പ് വെളിപ്പെടുത്തിയത്. വിശാലമായ മദീന പള്ളിയില്‍ ഉള്‍ഭാഗത്തും പുറംമുറ്റങ്ങളിലുമായി വിശാലമായ സ്ഥലത്ത് ഒരുക്കിയ പ്രത്യേക സ്ഥലങ്ങളില്‍ സ്വദേശികളും വിദേശികളുമടക്കം ലക്ഷങ്ങളാണ് ദിനേ ന പ്രാര്‍ഥനയില്‍ പങ്കെടുക്കുന്നത്. പള്ളിക്കകത്തും പുറത്തുമായി സ്ത്രീകള്‍ക്ക് പ്രത്യേക നിസ്‌കാര സ്ഥലങ്ങളും ഇവിടെ സജ്ജീകരിച്ചിട്ടുണ്ട്.

പതിനാല് ലക്ഷം വിശ്വാസികള്‍ തറാവീഹ് നിസ്‌കാരത്തിനായി മദീന പള്ളിയുടെ അകംഭാഗം ഉപയോഗപ്പെടുത്തിയപ്പോള്‍ പതിനഞ്ച് ലക്ഷം വിശ്വാസികള്‍ വിശാലമായ മുറ്റങ്ങളാണ് തറാവീഹ് നിസ്‌കാരത്തിനായി ഉപയോഗിച്ചത്. ദിനംപ്രതി ഏകദേശം 98,589 വിശ്വാസികള്‍ പ്രവാചക പള്ളിയുടെ ഉള്‍ഭാഗത്തും 1,00,868 പേര്‍ പള്ളിയുടെ മുറ്റങ്ങളിലും 15,623 പേര്‍ ഒന്നാം നിലയിലുമായി തറാവീഹ് നിസ്‌കാരത്തിന് പങ്കെടുക്കുന്നതായാണ് ഹറം കാര്യാലയ വകുപ്പ് വ്യക്തമാക്കുന്നത്. മദീനയിലെ ചരിത്രമായ നോമ്പുതുറയും വിശ്വാസികള്‍ക്ക് ഏറെ ഹൃദ്യമാണ്. പ്രവാചക സ്‌നേഹസാമീപ്യം പ്രകടമാകുന്ന ഇവിടെ ഒരിക്കല്‍ പങ്കെടുത്താല്‍ മനസില്‍നിന്ന് മായാത്ത നോമ്പുതുറയില്‍ പങ്കെടുക്കുന്നതിനായും വിശ്വാസികളുടെ തിരക്കുണ്ട്.