തിരുവനന്തപുരം: മലപ്പുറം ജില്ലയില്‍ സര്‍ക്കാര്‍ മേഖലയില്‍ പ്ലസ് വണ്‍ അഡിഷനല്‍ ബാച്ചുകള്‍ അനുവദിക്കുന്ന കാര്യം സര്‍ക്കാര്‍ പരിഗണിക്കുമെന്ന് മന്ത്രി സി. രവീന്ദ്രനാഥ് നിയമസഭയെ അറിയിച്ചു.
പി. ഉബൈദുല്ലയുടെ സബ്മിഷന് മറുപടി പറയുകയായിരുന്നു മന്ത്രി. കഴിഞ്ഞവര്‍ഷം മതിയായ കുട്ടികളില്ലാതെ മറ്റ് ജില്ലകളില്‍ ഒഴിഞ്ഞുകിടന്നിരുന്ന ഹയര്‍ സെക്കന്‍ഡറി ബാച്ചുകള്‍ മലപ്പുറം ജില്ലയിലേക്ക് മാറ്റിയിരുന്നു.
അതുപോലെ ഈ വര്‍ഷവും അഡ്മിഷന്‍ പൂര്‍ത്തിയായ ശേഷം ഒഴിഞ്ഞുകിടിക്കുന്ന ബാച്ചുകള്‍ ആവശ്യമുള്ള സ്ഥലങ്ങളിലേക്ക് മാറ്റാന്‍ നടപടി സ്വീകരിച്ചിട്ടുണ്ട്. തുടര്‍ന്നും സീറ്റുകള്‍ കിട്ടാതെ വരുന്ന സാഹചര്യമുണ്ടായാലാണ് അഡിഷനല്‍ ബാച്ചുകളുടെ കാര്യം പരിഗണിക്കുകയെന്ന് മന്ത്രി വ്യക്തമാക്കി.
സംസ്ഥാനത്ത് എസ്.എസ്.എല്‍.സി പരീക്ഷയില്‍ ഏറ്റവും കൂടുതല്‍ (2493) എ പ്ലസ്‌കാരുള്ള മലപ്പുറം ജില്ലയില്‍ 78,335 പേര്‍ ഉപരി പഠനത്തിന് യോഗ്യത നേടിയിട്ടുണ്ടെങ്കിലും 33,000ത്തോളം വിദ്യാര്‍ഥികള്‍ക്ക് ജില്ലയില്‍ ഉപരിപഠനത്തിന് അവസരമില്ലെന്ന് ഉബൈദുല്ല സബ്മിഷനില്‍ ചൂണ്ടിക്കാട്ടി.