കായംകുളം: വീടിനു നേരെ സാമൂഹിക വിരുദ്ധരുടെ ആക്രമണം. ബൈക്കിലെത്തിയ രണ്ടംഗ സംഘം വീടിന്റെ മുന്‍വശത്ത് കിടന്ന കാറിന്റെ ചില്ലുകള്‍ തല്ലി തകര്‍ത്തു. കരുവില്‍ പീടിക ഫസാന്‍ മന്‍സില്‍ നവാസ് യൂസുഫിന്റെ വീടിനുനേരെയാണ് ആക്രമണം ഉണ്ടായത്. ഇന്നലെ രാത്രി എട്ടരയോടെ സംഭവം.
ആക്രമണസമയത്ത് ഭാര്യ ഷീജയും കുട്ടികളും മാത്രമേ വീട്ടില്‍ ഉണ്ടായിരുന്നുള്ളു. പിന്നിലുള്ള അടുക്കളയില്‍ ആയിരുന്ന ഇവര്‍ ശബ്ദം കേട്ട് പുറത്തു വന്നപ്പോഴേക്കും ആക്രമികള്‍ ബൈക്കില്‍ കടന്നുകളഞ്ഞു. കായംകുളം പൊലിസ് കേസെടുത്തു. സംഭവസ്ഥലത്തുനിന്നും ഇരുമ്പു വടിയും തടിക്കഷ്ണങ്ങളും പൊലിസ് കണ്ടെടുത്തിട്ടുണ്ട്.