മനാമ: പാണക്കാട് സയ്യിദ് ഹൈദരലി ശിഹാബ് തങ്ങള്‍, നിയുക്ത എം.പി പി.കെ.കുഞ്ഞാലിക്കുട്ടി എന്നിവര്‍ക്ക് ബഹ്‌റൈന്‍ അന്താരാഷ്ട്ര വിമാനത്താവളത്തില്‍ പ്രവര്‍ത്തകരുടെ നേതൃത്വത്തില്‍ ഉജ്ജ്വല സ്വീകരണം നല്‍കി. ബഹ്‌റൈന്‍ കെ.എം.സിസിയുടെ നേതൃത്വത്തില്‍ നടക്കുന്ന 'ഹരിതചന്ദ്രിക 2017' ല്‍ പങ്കെടുക്കാനാണ് വ്യാഴാഴ്ച നേതാക്കള്‍ ബഹ്‌റൈനിലെത്തിയത്.
മലപ്പുറത്തെ വിജയത്തിനു ശേഷം കുഞ്ഞാലിക്കുട്ടിലുടെ പ്രഥമ ജി.സി.സി സന്ദര്‍ശനമാണിതെന്നു സ്വാഗതസംഘം വര്‍ക്കിങ് ചെയര്‍മാന്‍ കുട്ടൂസ മുണ്ടേരി അറിയിച്ചു. മുസ്‌ലിംലീഗിന്റെ നിയമസഭാ പാര്‍ട്ടി നേതാവായി ചുമതലയേറ്റ ഡോ. എം.കെ.മുനീറും ബഹ്‌റൈനിലെത്തുന്നുണ്ട്.
സ്വീകരണ ചടങ്ങില്‍ ആലിയ ഹമീദ് ഹാജി, എസ്.വി.ജലീല്‍, അസൈനാര്‍ കളത്തിങ്ങല്‍, ഹബീബുര്‍റഹ്മാന്‍, രാജു കല്ലുപുറം, ബിനു കുന്നന്താനം, നജീബ് കടലായി, അഷ്‌റഫ് തൂണേരി, കെ എം സി സി സംസ്ഥാന, ജില്ലാ, ഏരിയാ ഭാരവാഹികള്‍, സമസ്ത ബഹ്‌റൈന്‍ നേതാക്കള്‍ തുടങ്ങി നിരവധി നേതാക്കളും പ്രവര്‍ത്തകരും എത്തിയിരുന്നു.