റാമല്ല: അധിനിവേശ വെസ്റ്റ് ബാങ്കില്‍ പ്രതിഷേധത്തിന്റെ ഭാഗമായി ഫലസ്തീനികള്‍ കെട്ടിയുണ്ടാക്കിയ കുടിലുകള്‍ ഇസ്‌റാഈല്‍ സൈന്യം തകര്‍ത്തു. ഖാന്‍ അല്‍ അഹ്മറിലെ ബദോയൂനിനടുത്തായിരുന്നു കുടിലുകള്‍ കെട്ടിയിരുന്നത്.

ഇവിടെ ഫലസ്തീന്‍ പോരാളികള്‍ നിരവധി കുടിലുകള്‍ കെട്ടുകയും പ്രതിഷേധത്തിന്റെ ഭാഗമായി കുടിയിരിക്കുകയും ചെയ്തു. എന്നാല്‍ ഇസ്‌റാഈല്‍ സൈന്യമെത്തി എല്ലാം തകര്‍ത്തെറിയുകയായിരുന്നു.

പ്രതിഷേധക്കാര്‍ ''പുറത്ത് പുറത്ത്, തീവ്രവാദ സൈന്യം'' എന്ന മുദ്രാവാക്യം ഉറക്കെ വിളിക്കുകയും ചെയ്തു.

അധിനിവേശ വെസ്റ്റ് ബാങ്കില്‍ ജറൂസലമില്‍ നിന്ന് ചാവുകടലിലേക്കുള്ള ഇസ്‌റാഈലി ഹൈവേയ്ക്ക് സമീപത്തായാണ് ഖാന്‍ അല്‍ അഹ്മര്‍ പ്രദേശം.

ഈ ഗ്രാമം തകര്‍ത്ത് ഫലസ്തീന്‍ നിവാസികളെ മാറ്റിപാര്‍പ്പിക്കാനാണ് ഇസ്‌റാഈല്‍ തീരുമാനം. ഇതിനെതിരെയാണ് ഇവിടെ ആളുകള്‍ കുടില്‍കെട്ടി പ്രതിഷേധിച്ചത്.

ഖാന്‍ അല്‍ അഹ്മര്‍ തകര്‍ക്കുന്നതിനെതിരെ നല്‍കിയ ഹരജി ഇസ്‌റാഈല്‍ കോടതി തള്ളിയിരുന്നു. പെര്‍മിറ്റ് ഉണ്ടെങ്കില്‍ മാത്രമേ ഇവിടെ ഫലസ്തീനികള്‍ക്ക് നിര്‍മാണം അനുവദിക്കൂയെന്നും കോടതി ഉത്തരവിട്ടിരുന്നു. എന്നാല്‍ ഈ പെര്‍മിറ്റ് ഇസ്‌റാഈല്‍ അധികൃതര്‍ നല്‍കില്ലെന്നാണ് ഫലസ്തീനികള്‍ പറയുന്നത്.