HOME
DETAILS

കാലിക്കറ്റ് സിന്‍ഡിക്കേറ്റില്‍ അജന്‍ഡകള്‍ പരിഗണിക്കാനായില്ല

  
backup
July 25 2016 | 21:07 PM

%e0%b4%95%e0%b4%be%e0%b4%b2%e0%b4%bf%e0%b4%95%e0%b5%8d%e0%b4%95%e0%b4%b1%e0%b5%8d%e0%b4%b1%e0%b5%8d-%e0%b4%b8%e0%b4%bf%e0%b4%a8%e0%b5%8d%e2%80%8d%e0%b4%a1%e0%b4%bf%e0%b4%95%e0%b5%8d%e0%b4%95%e0%b5%87


തേഞ്ഞിപ്പലം:  കാലിക്കറ്റ് സര്‍വകലാശാല സിന്‍ഡിക്കേറ്റ് യോഗത്തില്‍ ഇടത് അംഗങ്ങളുടെ നിസഹകരണത്തെ തുടര്‍ന്ന് സുപ്രധാന അജന്‍ഡകളൊന്നും പരിഗണിച്ചില്ല.  
വിഷയങ്ങള്‍ പുതിയ അംഗങ്ങള്‍ വിശദമായി പഠിച്ചതിനു ശേഷം മാത്രം പരിഗണിച്ചാല്‍ മതിയെന്ന്  സംസ്ഥാന സര്‍ക്കാര്‍ നാമനിര്‍ദേശം ചെയ്ത ആറുപേര്‍ ഉള്‍പ്പെടുന്ന ഇടത്  സിന്‍ഡിക്കേറ്റംഗങ്ങള്‍ നിര്‍ബന്ധം പിടിച്ചതിനാല്‍ നാക് സന്ദര്‍ശനത്തിന്റെ  മുന്നോടിയായുള്ള മുന്നൊരുക്കങ്ങള്‍ മാത്രം ചര്‍ച്ച ചെയ്തു സിന്‍ഡിക്കേറ്റ്  പിരിയുകയായിരുന്നു.
കഴിഞ്ഞ സിന്‍ഡിക്കേറ്റ് യോഗ മിനുട്ട്‌സിന് അംഗീകാരം  നല്‍കുന്നതും ഇടത് അംഗങ്ങള്‍ തടഞ്ഞു.  സുപ്രധാന വിഷയങ്ങളിലെ  120 ഓളം അജന്‍ഡകള്‍ യോഗത്തില്‍ വച്ചെങ്കിലും ഒരെണ്ണം പോലും ഇന്നലെ പരിഗണിക്കാനായില്ല.
തര്‍ക്കവിഷയങ്ങളിലുള്ള അജന്‍ഡകള്‍  മാറ്റിവച്ച്  ഭരണപരവും അക്കാദമികവുമായ വിഷയങ്ങളിലുള്ള അജന്‍ഡകള്‍  പരിഗണിക്കാമെന്ന് യോഗ അധ്യക്ഷനായ വൈസ് ചാന്‍സലര്‍ ഡോ. കെ. മുഹമ്മദ്  ബഷീറും രജിസ്ട്രാര്‍ ഡോ. ടി. അബ്ദുല്‍മജീദും മറ്റ് അംഗങ്ങളും അഭ്യര്‍ഥിച്ചെങ്കിലും ഇടത് അംഗങ്ങള്‍ വിട്ടുവീഴ്ചയ്ക്ക് തയാറായില്ല. ഇതോടെ ഇന്നലെ രാവിലെ 10നു ചേര്‍ന്ന യോഗം നാക് പ്രതിനിധികളെ  സര്‍വകലാശാലയുടെ അക്കാദമിക ഭരണനേട്ടങ്ങളെ  ബോധ്യപ്പെടുത്തുന്നതിനുമായി തയാറാക്കിയ വീഡിയോ പ്രദര്‍ശനവും ചര്‍ച്ചയും  പൂര്‍ത്തിയാക്കി രാവിലെ പതിനൊന്നോടെ പിരിയുകയായിരുന്നു.
സര്‍ക്കാര്‍  നാമനിര്‍ദേശം ചെയ്ത സര്‍വകലാശാല ചരിത്രപഠന വിഭാഗത്തിലെ അധ്യാപകന്‍  ഡോ. പി. ശിവദാസനാണ് പുതിയ അംഗങ്ങള്‍ കാര്യങ്ങള്‍ വിശദമായി പഠിച്ചതിന് ശേഷം മാത്രം അജന്‍ഡകള്‍ പരിഗണിച്ചാല്‍ മതിയെന്ന് സിന്‍ഡിക്കേറ്റില്‍  ആദ്യം ആവശ്യപ്പെട്ടത്. ഇതിനെ മറ്റ് ഇടതു അംഗങ്ങളും  പിന്തുണക്കുകയായിരുന്നു.
കേരള സര്‍വ്വകലാശാല പ്രോ വൈസ് ചാന്‍സലര്‍  പ്രൊഫ: വീരമണികണ്ഠന്റെ പി.എച്ച്.ഡി പ്രബന്ധം കോപ്പിയടിയാണെന്ന്  സ്ഥിരീകരിച്ച അന്വേഷണ കമ്മീഷന്‍ റിപ്പോര്‍ട്ടും പഠന ബോര്‍ഡ് പുന: സംഘടനയും  പ്യൂണ്‍-വാച്ച്മാന്‍ റാങ്ക് ലിസ്റ്റ് ചോര്‍ച്ചയിലെ അന്വേഷണ വിഷയങ്ങളുമാണ്  ഇന്നലെ സിന്‍ഡിക്കേറ്റ് പരിഗണിക്കേണ്ടിയിരുന്ന സുപ്രധാന അജന്‍ഡകള്‍.  
സിന്‍ഡിക്കേറ്റ് ഓഗസ്റ്റ് ഒന്നിന് വീണ്ടും യോഗം ചേരും. സര്‍ക്കാര്‍  നാമനിര്‍ദേശം ചെയ്ത ആറ് പുതിയ അംഗങ്ങളും നേരത്തെയുള്ള മൂന്ന്  അംഗങ്ങളും അടക്കം സിന്‍ഡിക്കേറ്റില്‍ ഇടതിന്  ഒന്‍പതാണ് അംഗബലം.
ഇവര്‍ക്ക്  പുറമേ മെമ്പര്‍ സെക്രട്ടറി, ഐ.ടി സെക്രട്ടറി, വിദ്യാഭ്യാസ സെക്രട്ടറി,  വിദ്യാഭ്യാസ വകുപ്പ് ഡയറക്ടര്‍ എന്നിവര്‍ കൂടിയാകുമ്പോള്‍ സിന്‍ഡിക്കേറ്റില്‍  ഭൂരിപക്ഷവുമാകും.
എന്നാല്‍ ഇന്നലത്തെ യോഗത്തില്‍ മെമ്പര്‍ സെക്രട്ടറിമാര്‍ ആരും  തന്നെയുണ്ടായിരുന്നില്ല.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."