ചങ്ങനാശേരി: ബൈക്കുകള്‍ തമ്മില്‍ കൂട്ടിയിടിച്ചുണ്ടായ അപകടത്തില്‍ മൂന്നു പേര്‍ മരിച്ചു. വാഴൂര്‍ റോഡില്‍ ചങ്ങനാശേരി വലിയകുളത്തിന് സമീപത്താണ് സംഭവം. ഒരാളെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചു.

ചങ്ങനാശേരി പാറേല്‍ പള്ളിക്ക് സമീപം കുട്ടമ്പേരൂര്‍ ചക്കാലക്കല്‍ വീട്ടീല്‍ ജോണി ജോസഫിന്റെ മകനും എറണാകുളം രാജഗിരി കോളേജിലെ ബികോം വിദ്യാര്‍ഥിയുമായ ജെറിന്‍ ജോണി (19), ഇത്തിത്താനം മലകുന്നം കുറിഞ്ഞി പറമ്പില്‍ വര്‍ഗീസ് മത്തായി (ജോസ്- 69) ഇദ്ദേഹത്തിന്റെ മരുമകനും വാഴപ്പള്ളി പറാല്‍ സ്വദേശിയുമായ ജിന്റോ ജോസ് (37) എന്നിവരാണ് മരിച്ചത്.

ജെറിന്‍ ജോണിയ്‌ക്കൊപ്പം ബൈക്കില്‍ യാത്ര ചെയ്ത വാഴപ്പള്ളി സ്വദേശി കെവിന്‍ ഫ്രാന്‍സിസിനെ (19) ഗുരുതര പരുക്കുകളോടെ ചങ്ങനാശേരിയിലെ ചെത്തിപ്പുഴ ആശുപത്രിയില്‍ പ്രവേശിപ്പിച്ചു. ശനിയാഴ്ച രാത്രി പത്തരയോടെ ചങ്ങനാശേരി വലിയകുളത്തിലായിരുന്നു അപകടം.