ലക്‌നൗ: ഉത്തര്‍പ്രദേശിലെ ഫിറോസാബാദില്‍ പീഡനശ്രമം ചെറുത്ത 16കാരിയെ പ്രതികള്‍ വെടിവച്ചു കൊന്നു. മൂന്നുപേരാണ് സംഭവത്തിനു പിന്നിലെന്നു പൊലിസ് വ്യക്തമാക്കി. ഇവരെ പിന്നീട് അറസ്റ്റ് ചെയ്തിട്ടുണ്ട്.
വെള്ളിയാഴ്ച ഉച്ചയോടെ വിദ്യാഭ്യാസ സ്ഥാപനത്തില്‍നിന്നു വീട്ടിലേക്കു മടങ്ങുന്നതിനിടെയാണ് പന്ത്രണ്ടാം ക്ലാസ് വിദ്യാര്‍ഥിക്കുനേരെ മൂന്നുപേര്‍ അതിക്രമം നടത്തിയത്. പീഡനശ്രമം ചെറുത്ത വിദ്യാര്‍ഥി വീട്ടില്‍ തിരിച്ചെത്തി. എന്നാല്‍, പ്രതികള്‍ രാത്രി പെണ്‍കുട്ടിയുടെ വീട്ടിലെത്തി അതിക്രമം നടത്തുകയായിരുന്നു. കുടുംബം തടയാന്‍ ശ്രമിച്ചതോടെ പെണ്‍കുട്ടിക്കുനേരെ നിറയൊഴിക്കുകയും പ്രതികള്‍ കടന്നുകളയുകയുമായിരുന്നുവെന്നാണ് പൊലിസ് വ്യക്തമാക്കുന്നത്. പെണ്‍കുട്ടി സംഭവസ്ഥലത്തുതന്നെ മരിച്ചു. തുടര്‍ന്നു മൂന്നുപേരെയും പൊലിസ് പിടികൂടി. പെണ്‍കുട്ടിയുടെ പിതാവിന്റെ പരാതിയില്‍ മനീഷ് യാദവ്, ശിവപാല്‍ യാദവ്, ഗൗരവ് ചാക് എന്നിവരെയാണ് പിടികൂടിയിരിക്കുന്നത്. മധ്യപ്രദേശിലെ ഗ്വാളിയോറില്‍ മൂന്നുവയസുകാരിയെ പീഡിപ്പിച്ചയാളെയും പിടികൂടിയിട്ടുണ്ട്.