തിരുവനന്തപുരം: സംസ്ഥാന ശിശുക്ഷേമ സമിതിയില്‍ ലീഗല്‍ കണ്‍സല്‍ട്ടന്റ് നിയമനത്തില്‍ ക്രമക്കേടെന്നാരോപിച്ച് മുഖ്യമന്ത്രിക്ക് പരാതി. സി.പി.എം ഭരിക്കുന്ന ഭരണസമിതിക്കെതിരേ പാര്‍ട്ടി അനുഭാവികള്‍ തന്നെയാണ് ആക്ഷേപം ഉന്നയിച്ചിരിക്കുന്നത്.
കഴിഞ്ഞ മാസം എട്ടിനായിരുന്നു അഭിമുഖ പരീക്ഷ. അടുത്ത ദിവസം തന്നെ സി.പി.എമ്മുമായി ബന്ധമുള്ള അഡ്വക്കേറ്റ് വി.വി രതീഷിനെ ലീഗല്‍ കണ്‍സള്‍ട്ടന്റായി നിയമിച്ചു. അപേക്ഷിച്ച മുഴുവന്‍ പേരെയും അഭിമുഖത്തിന് വിളിച്ചില്ല, അഭിമുഖത്തില്‍ ക്രമക്കേട് നടത്തി എന്നൊക്കെയാണ് നിയമനത്തിനെതിരേ ഉയര്‍ന്ന പരാതികള്‍. ഉന്നതവിദ്യാഭ്യാസ വകുപ്പ് അച്ചടക്കനടപടിക്കു ശുപാര്‍ശ ചെയ്ത ആളാണ് അഭിമുഖം നടത്തിയതെന്നും ആക്ഷേപമുണ്ട്.
സി.പി.എം അനുകൂല സംഘടനയായ ഓള്‍ ഇന്ത്യ ലോയേഴ്‌സ് യൂനിയന്‍ ജില്ലാ കമ്മിറ്റി അംഗമായ ആദര്‍ശ് കരകുളമാണ് മുഖ്യമന്ത്രിക്കു പരാതി നല്‍കിയത്. ശിശുക്ഷേമ സമിതിയുടെ പ്രസിഡന്റ് കൂടിയായ മുഖ്യമന്ത്രി അന്വേഷണം നടത്തണമെന്നാണ് ആവശ്യം. അഭിമുഖ പരീക്ഷയില്‍നിന്ന് ഒഴിവാക്കിയെന്നു കാണിച്ച് പാര്‍ട്ടിയുമായി ബന്ധമുള്ള നിരവധി പേര്‍ സി.പി.എം ജില്ലാ സെക്രട്ടറിയേയും സമീപിച്ചിട്ടുണ്ട്.
എന്നാല്‍ കരാര്‍ അടിസ്ഥാനത്തില്‍ ഒരു വര്‍ഷത്തേക്ക് നടത്തിയ നിയമനം മാനദണ്ഡം അനുസരിച്ചാണെന്നാണ് ശിശുക്ഷേമ സമിതിയുടെ വിശദീകരണം. പരാതിയൊന്നും കിട്ടിയിട്ടില്ലെന്നും സമിതി ജനറല്‍ സെക്രട്ടറി ഷിജുഖാന്‍ വിശദീകരിച്ചു.