തിരുവനന്തപുരം: മുന്‍പ്രധാനമന്ത്രി രാജീവ്ഗാന്ധിയുടെ 28 ാമത് രക്തസാക്ഷിത്വ ദിനത്തോടനുബന്ധിച്ച് കര്‍ണാടക പ്രദേശ് കോണ്‍ഗ്രസ് കമ്മിറ്റിയുടെ ആഭിമുഖ്യത്തില്‍ നടത്തുന്ന 'രാജീവ് ജ്യോതി യാത്ര' 16,17 തിയതികളില്‍ കേരളത്തിലൂടെ കടന്നു പോകുമെന്ന് കെ.പി.സി.സി ജനറല്‍ സെക്രട്ടറി തമ്പാനൂര്‍ രവി അറിയിച്ചു. 16 ന് കേരളത്തില്‍ പ്രവേശിക്കുന്ന യാത്രയ്ക്ക് പാലക്കാട്,തൃശൂര്‍, ആലുവ , കൊച്ചി എന്നിവിടങ്ങളില്‍ സ്വീകരണം നല്‍കും. 17 ന് രാവിലെ 8 ന് കൊച്ചിയില്‍ നിന്നും പുറപ്പെടുന്ന യാത്ര രാവിലെ 11 ന് ആലപ്പുഴയിലും ഉച്ചതിരിഞ്ഞ് 3 ന് കൊല്ലത്തും നല്‍കുന്ന സ്വീകരണത്തിന് ശേഷം വൈകിട്ട് 5 മണിയോടെ തിരുവനന്തപുരം ജില്ലയില്‍ പ്രവേശിക്കും. യാത്രയെ കെ.പി.സി.സി ആസ്ഥാനമായ ഇന്ദിരാഭവനില്‍ കെ.പി.സി.സി പ്രസിഡന്റ് എം.എം ഹസന്റെ നേതൃത്വത്തില്‍ സ്വീകരിക്കും. തുടര്‍ന്ന് തമിഴ്‌നാട്ടിലേക്ക് പ്രവേശിക്കുന്ന യാത്ര 21 ന് ശ്രീപെരുമ്പത്തൂരില്‍ അവസാനിക്കുമെന്നും തമ്പാനൂര്‍ രവി അറിയിച്ചു.