മാവേലിക്കര:ചെട്ടികുളങ്ങര പൈതൃകകേന്ദ്രത്തിന്റെ ആഭിമുഖ്യത്തില്‍ സംഘടിപ്പിക്കുന്ന ചെട്ടികുളങ്ങര പൈതൃകമേള 20,21,22,23 തീയതികളില്‍ പനച്ചമൂട് ഉലുവത്ത് സ്‌കൂള്‍ അങ്കണത്തില്‍ നടക്കും.
മേളയില്‍ കല, സംസ്‌കാരം, വിദ്യാഭ്യാസം, കൃഷി, ആരോഗ്യം, വിനോദം തുടങ്ങി നിത്യജീവിത സംബന്ധിയായ എല്ലാ കാര്യങ്ങളേയും ബന്ധിപ്പിച്ചിട്ടുണ്ടെന്ന് സംഘാടകര്‍ പത്രസമ്മേളനത്തില്‍ അറിയിച്ചു. ഐ.എസ്.ആര്‍.ഒയുടെ ബഹിരാകാശ അനുബന്ധപ്രവര്‍ത്തനങ്ങല്‍, ചിത്ര പ്രദര്‍ശനം, പുരാവസ്തുകളുടെ പ്രദര്‍ശനം, കരകൗശല വസ്തുക്കളുടെ പ്രദര്‍ശനം എന്നിവയും സംഘടിപ്പിച്ചിരിക്കുന്നു. 20ന് രാവിലെ 10ന് കായംകുളം എംഎല്‍എ പ്രതിഭാഹരി ഉദ്ഘാടനം നിര്‍വ്വഹിക്കും.
സ്വാഗത സംഘം ചെയര്‍മാന്‍ എ.മഹേന്ദ്രന്‍ അധ്യക്ഷത വഹിക്കും.    11.30ന് ചിത്ര കൗതുകം തുറക്കല്‍ മുന്‍ ലളിതകലാ അക്കാദമി ചെയര്‍മാന്‍ കാട്ടൂര്‍ നാരായണപിള്ള ഉദ്ഘാടനം ചെയ്യും. വൈകിട്ട് 4.30ന് പൈതൃകോത്സവ ഉദ്ഘാടനം കെ.സി.വേണുഗോപാല്‍ നിര്‍വ്വഹിക്കും. മാവേലിക്കര എംഎല്‍എ ആര്‍.രാജേഷ് അധ്യക്ഷത വഹിക്കും. കടമനിട്ട വാസുദേവന്‍ പിള്ള മുഖ്യ അതിഥിയായിരിക്കും.
5ന് പുള്ളുവന്‍പാട്ട്, 7ന് കാക്കാരശി നാടകം. 21ന് രാവിലെ 10ന് ചിത്രസല്ലാപം രാജാരവിവര്‍മ്മ കോളേജ് പ്രിന്‍സിപ്പല്‍ ടെന്‍സിംഗ് ജോസഫ് ഉദ്ഘാടനം ചെയ്യും, ഉച്ചയ്ക്ക് 3ന് കവി സമ്മേളനം, വൈകിട്ട് 4 മുതല്‍ സ്‌കൂള്‍ യുവജനോത്സവ വിജയികളുടെ കലാവിരുന്ന് സര്‍ഗ്ഗോത്സവം നടക്കും. രാത്രി 7ന് തോല്‍പ്പാവകൂത്ത്, 8.30 മുതല്‍ ചവിട്ടു നാടകം.
22ന് 10ന് ചിത്രകാരന്മാര്‍ അണിയിച്ചൊരുക്കുന്ന ഓണാട്ടുകരയുടെ മുഖചിത്രം ഒറ്റ ക്യാന്‍വാസിലുള്ള ചിത്രരചന, ഉച്ചയ്ക്ക് 3ന് വിവിധ മേഖലകളിലെ പ്രതിഭകളെ ആദരിക്കുന്ന ആദരായനം ഫ്രാന്‍സിസ്.ടി.മാവേലിക്കര ഉദ്ഘാടനം ചെയ്യും. പ്രവീണ്‍ ഇറവന്‍കര ആദരിക്കല്‍ നിര്‍വ്വഹിക്കും. വൈകിട്ട് 6ന് തീയാട്ട്, 7.30ന് യക്ഷഗാനം ബൊമ്മയാട്ടം. 23ന് രാവിലെ 10ന് ചിത്രകാരന്മാരുടെ ചിത്രകലാ പ്രദര്‍ശനമായ ചിത്രസംയോജനം, സമാപന സമ്മേളനം, രാത്രി 7.30ന് ഇപ്റ്റയുടെ കേരളോത്സവം നാടന്‍പാട്ടും ദൃശ്യാവിഷ്‌കാരവും എന്നിവ നടക്കും.
മേളയില്‍ പൈതൃക കലാപ്രകടനങ്ങള്‍, കാര്‍ഷിക വിളമേള, ചക്കമഹോത്സവം, മാമ്പഴപ്പെരുമ, നാടന്‍ രുചിമേള, ചിത്രകലാ പ്രദര്‍ശനങ്ങള്‍ പുസ്തക ചന്ത, സാങ്കേതിക പ്രദര്‍ശനങ്ങള്‍, കരകൗശല പ്രദര്‍ശനങ്ങള്‍ എന്നിവയും ഉണ്ടായിരിക്കുമെന്ന് ജനറല്‍ കണ്‍വീനര്‍ ജേക്കബ് ഉമ്മന്‍, സെക്രട്ടറി സജിത്ത് സംഘമിത്ര, കണ്‍വീനര്‍ രാജേഷ് ഉണ്ണിച്ചേത്ത്, പബ്ലിസിറ്റി ചെയര്‍മാന്‍ രാജന്‍ ചെങ്കിളില്‍, പബ്ലിസിറ്റി കണ്‍വീനര്‍ ഗോപന്‍ ഗോകുലം, മീഡിയ ചെയര്‍മാന്‍, ശ്രീപ്രകാശ്, മീഡിയ കണ്‍വീനര്‍ അനില്‍, ഫിനാന്‍സ് കമ്മറ്റി ചെയര്‍മാന്‍ എസ്.ശശി, ട്രഷറാര്‍ പത്മരാജ് എന്നിവര്‍ അറിയിച്ചു.