മലപ്പുറം: സൗരയൂഥത്തിലെ ഏറ്റവും വലിയ ഗ്രഹമായ വ്യാഴത്തിന്റെ 'ഓപ്പോസിഷന്‍' പ്രതിഭാസം ഇന്ന്. ഭൂമി മധ്യത്തിലായി സൂര്യന്‍, ഭൂമി, വ്യാഴം എന്നിവ നേര്‍രേഖയില്‍ വരുന്നതാണ് ഓപ്പോസിഷന്‍ പ്രതിഭാസം.

രാത്രി ആകാശത്ത് മഴമേഘങ്ങള്‍ രൂപപ്പെട്ടില്ലെങ്കില്‍ ഭീമന്‍ ഗ്രഹത്തിന്റെ ഈ മനോഹര കാഴ്ച ഇന്ന് അനായാസം നഗ്നനേത്രങ്ങള്‍ കൊണ്ട് കാണാനാവുമെന്ന് വാനനിരീക്ഷകന്‍ ഇല്യാസ് പെരിമ്പലം പറഞ്ഞു. ഓപ്പോസിഷന്‍ സമയത്ത് വ്യാഴം ഭൂമിയുടെ ഏറ്റവും അരികില്‍ വരുന്നു.
ഒപ്പം സൂര്യപ്രകാശമേല്‍ക്കുന്ന വ്യാഴത്തിന്റെ മുഖം മുഴുവനും ഭൂമിക്ക് അഭിമുഖമായും വരും. അതിനാല്‍ ഓപ്പോസിഷന്‍ വേളകളില്‍ വ്യാഴത്തെ അത്യധിക ശോഭയില്‍ രാത്രി മുഴുവന്‍ നഗ്നനേത്രങ്ങള്‍ കൊണ്ട് കണ്ട് ആസ്വദിക്കാനാവും. ഇന്ന് വൈകിട്ട് 6.42ന് കിഴക്കുദിക്കുന്ന വ്യാഴം പാതിരാത്രി കഴിഞ്ഞ് 12.24ന് നേര്‍ മുകളിലെത്തുകയും പുലര്‍ച്ചെ 6.07ന് പടിഞ്ഞാറ് അസ്തമിക്കുകയും ചെയ്യും. ഇന്നും തുടര്‍ന്നുള്ള ദിവസങ്ങളും വ്യാഴം നിരീക്ഷണത്തിന് അനുയോജ്യമാണ്. ടെലിസ്‌കോപ്പിലൂടെയോ ബൈനോക്കുലറിലൂടെയോ നിരീക്ഷിച്ചാല്‍ വ്യാഴത്തിന്റെ ഒരു വശത്ത് ഐയോ, കലിസ്‌റ്റോ, മറു വശത്ത് യൂറോപ്പ, ഗാനിമേഡ് എന്നീ ഉപഗ്രഹങ്ങള്‍ അണിനിരക്കുന്ന മനോഹര ദൃശ്യവും കാണാനാവും.