കോവളം: അന്താരാഷ്ട്ര തീരശുചീകരണ ദിനാചരണത്തോടനുബന്ധിച്ച് വിഴിഞ്ഞം തീരസംരക്ഷണ സേനയുടെ നേതൃത്വത്തില്‍ അന്തര്‍ ദേശീയ ടൂറിസം കേന്ദ്രമായ കോവളം ബീച്ചും പരിസരവും ശുചീകരിച്ചു.
തീരസംരക്ഷണത്തെ കുറിച്ച് ജനങ്ങളെ ബോധവല്‍കരിക്കുന്നതിന്റെ ഭാഗമായി വിഴിഞ്ഞം മുതല്‍ കോവളം വരെ നടത്തിയ റാലിക്കെടുവില്‍ ആരംഭിച്ച ശുചീകരണ പ്രവര്‍ത്തനങ്ങള്‍ സേനയുടെ വിഴിഞ്ഞം സ്റ്റേഷന്‍ ഓഫിസര്‍ കമാന്‍ഡന്റ് ജോര്‍ജ്ജ് ബേബി ഉദ്ഘാടനം ചെയ്തു. കോവളം ബീച്ചില്‍ നടത്തിയ ശുചീകരണപ്രവര്‍ത്തനങ്ങളില്‍ കോവളം ജനമൈത്രി പൊലിസ്, തീരദേശ പൊലിസ്, മറൈന്‍ എന്‍ഫോഴ്‌സ്‌മെന്റ്, നഗരസഭാ ജീവനക്കാര്‍ തുടങ്ങിയവര്‍ പങ്കെടുത്തു. തിരത്ത് നിന്നും ശേഖരിച്ച് പ്ലാസ്റ്റിക്ക് ബാഗുകളിലാക്കിയ 300 കിലോയോളം വരുന്ന മാലിന്യം സംസ്‌കരിക്കാനായി നഗരസഭാ അധികൃതര്‍ക്ക് കൈമാറി.