ന്യൂഡല്‍ഹി: യു.പി മുഖ്യമന്ത്രി യോഗി ആദിത്യനാഥിനെതിരെ പരിഹാസ പരാമര്‍ശം നടത്തിയ മാധ്യമപ്രവര്‍ത്തകന്‍ പ്രശാന്ത് കനോജിയയെ അറസ്റ്റ് ചെയ്തതിനെതിരെ സുപ്രിം കോടതി. ഇത് കൊലപാതകമല്ല നടന്നതെന്നും കനോജിയയെ ഉടന്‍ ജയില്‍ മോചിപ്പിക്കണമെന്നും സുപ്രിം കോടതി ഉത്തരവിട്ടു.

കനോജിയയുടെ ഭാര്യയുടെ ഹരജി സ്വീകരിച്ചാണ് സുപ്രിം കോടതിയുടെ നടപടി. സാധാരണ ഇത്തരം ഹരജികള്‍ കോടതി പരിഗണിക്കാറില്ലെന്നും എന്നാല്‍, അദ്ദേഹത്തെ 11 ദിവസം കൂടി ജയിലില്‍ അടയ്ക്കാനാവില്ലെന്നും കോടതി നിരീക്ഷിച്ചു.

മുഖ്യമന്ത്രിക്കെതിരെ പരാമര്‍ശമുള്ള പോസ്റ്റിട്ടുവെന്ന ആരോപണത്തില്‍ അഞ്ചു പേരെയാണ് രണ്ടു ദിവസത്തിനിടെ അറസ്റ്റ് ചെയ്തത്. കനോജിയയെ ശനിയാഴ്ചയാണ് അറസ്റ്റ് ചെയ്തത്.

ഇതിനെതിരെ വ്യാപക പ്രതിഷേധമാണ് സാമൂഹ്യ മാധ്യമങ്ങളില്‍ നടക്കുന്നത്. അഭിപ്രായ സ്വാതന്ത്ര്യത്തിനു മേലുള്ള കൂച്ചുവിലങ്ങാണിതെന്ന് പലരും അഭിപ്രായപ്പെട്ടു.

യോഗി ആദിത്യനാഥിനോട് വിവാഹാഭ്യര്‍ഥന നടത്തിയെന്ന് പറഞ്ഞ് ഒരു സ്ത്രീ മാധ്യമങ്ങളെ കാണുന്നതിന്റെ വീഡിയോ ആണ് കനോജിയ ട്വിറ്ററിലും ഫെയ്‌സ്ബുക്കിലും ഷെയര്‍ ചെയ്തത്. ഇതേ സംഭവത്തില്‍ നോയിഡയിലെ സ്വകാര്യ ചാനല്‍ മേധാവികളെയും എഡിറ്റര്‍മാരെയും അറസ്റ്റ് ചെയ്യുകയായിരുന്നു.