പാകിസ്താനെതിരേയുള്ള മത്സരത്തില്‍ തന്റെ കരിയറിലെ 24ാം സെഞ്ചുറി കണ്ടെത്തിയ രോഹിത് ഒരുപിടി റെക്കോര്‍ഡുകളും തന്റെ പേരില്‍ കുറിച്ചു. ഈ ലോകകപ്പില്‍ തന്റെ രണ്ടാമത്തെ സെഞ്ചുറി നേടിയ രോഹിത് ലോകകപ്പുകളില്‍ ഇതുവരെ നേടിയത് മൂന്നു സെഞ്ചുറികള്‍.
ഈ ലോകകപ്പില്‍ ആദ്യ മൂന്നു ഇന്നിങ്‌സുകളിലുംഅര്‍ധ സെഞ്ചുറി നേടിയ രോഹിത് ശര്‍മ ലോകകപ്പുകളില്‍ ആദ്യ മൂന്നു ഇന്നിങ്‌സുകളില്‍ തുടര്‍ച്ചയായി അര്‍ധ സെഞ്ചുറികള്‍ നേടിയ ഇന്ത്യന്‍ താരങ്ങളുടെ പട്ടികയിലും ഇടംനേടി. നവ്‌ജ്യോത് സിദ്ധു(1987), സച്ചിന്‍ തെന്‍ഡുള്‍ക്കര്‍(1996), യുവരാജ് സിങ്(2011) എന്നിവരാണ് ഈ നേട്ടം നേരത്തെ കരസ്ഥമാക്കിയത്. അതിവേഗത്തില്‍ 24 സെഞ്ചുറി പിന്നിട്ട താരങ്ങളുടെ പട്ടികയിലും രോഹിത് ഇടം നേടി. 203 ഇന്നിങ്ങ്‌സുകള്‍ മാത്രമേ രോഹിത്തിന് വേണ്ടി വന്നുള്ളു ഇക്കാര്യത്തില്‍ ഇന്ത്യന്‍ ക്രിക്കറ്റ് ഇതിഹാസം സച്ചിനെയും രോഹിത് മറികടന്നു.
142 മത്സരങ്ങളില്‍ നിന്ന് അതിവേഗത്തില്‍ 24 സെഞ്ചുറി നേടിയ ദക്ഷിണാഫ്രിക്കയുടെ ഹാഷിം അംല ഒന്നാമതും വിരാട് കോഹ്‌ലി(161) രണ്ടാമതും എ.ബി. ഡിവില്ലിയേഴ്‌സ്(203) ആണ് ആദ്യ മൂന്നു സ്ഥാനക്കാര്‍.ഇന്ത്യക്കു വേണ്ടി ലോകകപ്പില്‍ ഏറ്റവും കൂടുതല്‍ സെഞ്ചുറി നേടിയ താരങ്ങളിലും രോഹിത് ഉള്‍പ്പെട്ടു. ധവാനൊപ്പം മൂന്നാമനായും രോഹിത് മാറി. ആറു സെഞ്ചുറികള്‍ നേടിയ സച്ചിനാണ് ലോകകപ്പില്‍ ഏറ്റവും കൂടുതല്‍ സെഞ്ചുറി നേടിയത്. ഇന്ത്യക്കു വേണ്ടി നാലു സെഞ്ചുറികള്‍ ഗാംഗുലിയും നേടിയിട്ടുണ്ട്. മൂന്നു വീതം സെഞ്ചുറികള്‍ നേടിയ ധവാനും രോഹിതുംമാണ് മൂന്നാം സ്ഥാനത്ത്.
വിരാട് കോഹ്‌ലിക്കു ശേഷം ഏകദിന ലോകകപ്പില്‍ പാകിസ്താനെതിരേ സെഞ്ചുറി നേടുന്ന രണ്ടാമത്തെ താരമാണ് രോഹിത്. 140 റണ്‍സ് നേടിയ രോഹിത് പാകിസ്താനെതിരേ ലോകകപ്പില്‍ ഒരു ഇന്ത്യന്‍ താരത്തിന്റെ ഏറ്റവും ഉയര്‍ന്ന വ്യക്തിഗത സ്‌കോറെന്ന നേട്ടം സ്വന്തമാക്കി. മറികടന്നത് കോഹ്‌ലിയെ .
ഈ മത്സരത്തില്‍ മൂന്നു സിക്‌സുകള്‍ നേടിയതോടെ ഏകദിന ക്രിക്കറ്റില്‍ ഇന്ത്യക്കു വേണ്ടി ഏറ്റവും കൂടുതല്‍ സിക്‌സര്‍ നേടുന്ന താരവുമായി രോഹിത് (356). ധോണിയുടെ 355 സിക്‌സിന്റെ റെക്കോര്‍ഡാണ് മറികടന്നത്.