റിയാദ്: പുതുതായി സഊദിയിലെത്തിയ ഇന്ത്യൻ അംബാസിഡർ ഡോ. ഔസാഫ് സഈദ് സഊദി ഭരണാധികാരി സൽമാൻ രാജാവിന് അധികാരപത്രം കൈമാറി. ജിദ്ദ അൽസലാം കൊട്ടാരത്തിലാണ് അംബാസിഡർ സൽമാൻ ബിൻ അബ്ദുൽ അസീസ് രാജാവിനെ സന്ദർശിച്ചത്. ഇന്ത്യയെ കൂടാതെ ഏതാനും രാഷ്ട്ര പ്രതിനിധികളും രാജാവിനെ സന്ദർശിച്ച് അധികാര പത്രം കൈമാറി. സഊദി അറേബ്യയും തങ്ങളുടെ രാജ്യങ്ങളും തമ്മിലുള്ള ബന്ധം ശക്തമാക്കുന്നതിൽ വിജയം വരിക്കുന്നതിന് അംബാസഡർമാർക്ക് സാധിക്കട്ടെയെന്ന് രാജാവ് ആശംസിച്ചു.

 

കസാക്കിസ്ഥാൻ അംബാസഡർ ബെരിക് അരിൻ, ചൈനീസ് അംബാസഡർ ചെൻ വീഖിംഗ്, അമേരിക്കൻ അംബാസഡർ ജോൺ അബീസൈദ് എന്നിവരാണ് കഴിഞ്ഞ ദിവസം സൽമാൻ രാജാവിന് അധികാരപത്രങ്ങൾ കൈമാറിയ മറ്റു രാജ്യക്കാർ.  

 

സഹമന്ത്രി ഡോ. മുസാഅദ് അൽഈബാൻ, വിദേശ മന്ത്രി ഡോ. ഇബ്രാഹിം അൽഅസ്സാഫ്, സഹമന്ത്രിയും റോയൽ കോർട്ട് പ്രസിഡന്റുമായ ഖാലിദ് അൽഈസ, റോയൽ പ്രോട്ടോകോൾ വിഭാഗം മേധാവി ഖാലിദ് അൽഅബാദ്, റോയൽ ഗാർഡ് മേധാവി ജനറൽ സുഹൈൽ അൽമുതൈരി, വിദേശ മന്ത്രാലയ അണ്ടർ സെക്രട്ടറി അസ്സാം അൽഖൈൻ എന്നിവർ ചടങ്ങിൽ സംബന്ധിച്ചു.