കോട്ടയം: കഴിഞ്ഞ ഓണത്തിന് പ്രവര്‍ത്തനം ആരംഭിച്ച കോടിമത വാട്ടര്‍പാര്‍ക്കിലെ ഉപകരണങ്ങള്‍ നശിക്കുന്നു. ഇതോടെ പാഴായത് ലക്ഷങ്ങള്‍.
കൊടൂരാറില്‍ പോളവന്നു നിറഞ്ഞതോടെയാണ് വാട്ടര്‍പാര്‍ക്കിലെ ഉപകരണങ്ങള്‍ നശിച്ചു തുടങ്ങിയത്.പോളവാരലുമായി ബന്ധപ്പെട്ട് നഗരസഭയും ഇറിഗേഷന്‍ ഡിപ്പാര്‍ട്ടുമെന്റും തമ്മില്‍ നടക്കുന്ന വാക്കുതര്‍ക്കം മൂലമാണ് കോടിമതവാട്ടര്‍പാര്‍ക്കിന്റെ പ്രവര്‍ത്തനങ്ങള്‍ നിലച്ചതെന്നാണ് അധികൃതര്‍ നല്‍കുന്ന വിശദീകരണം.
 സാഹസിക ജലവിനോദ ഉപകരണങ്ങള്‍ ഉള്‍പ്പെടുത്തി ജില്ലാ ടൂറിസം പ്രൊമോഷന്‍ കൗണ്‍സിലിന്റെ നേതൃത്വത്തിലാണ് കഴിഞ്ഞ ഓണത്തിനു വാട്ടര്‍പാര്‍ക്ക് പാര്‍ക്ക് തുറന്നത്. നഗരവാസികള്‍ക്ക് സായാഹ്നങ്ങള്‍ ചെലവഴിക്കാനും കുട്ടികള്‍ക്കു വിനോദവുമൊരുക്കാനും ലക്ഷ്യമിട്ട് തുറന്ന പാര്‍ക്കാണ് പോളശല്യത്തെ തുടര്‍ന്ന് നശിക്കുന്നത്.  ടൂറിസം പ്രൊമോഷന്‍ കൗണ്‍സിലിന്റെ നേതൃത്വത്തില്‍ 40 ലക്ഷം രൂപയുടെ പോളവാരല്‍ മെഷീന്‍ വാങ്ങാന്‍ അനുമതിതേടിയെങ്കിലും ആ പദ്ധതിയുടെ ചുവപ്പുനാടയില്‍ കുരുങ്ങിക്കിടക്കുകയാണ്.
വെള്ളത്തിലുള്ള വിവിധ വിനോദോപാധികള്‍ക്കായി 12 ലക്ഷത്തോളം രൂപയുടെ ഉപകരണങ്ങളാണ് കോടതിമത വാട്ടര്‍ പാര്‍ക്കില്‍ ഒരുക്കിയത്.  ഒരേസമയം നാലുപേര്‍ക്ക് ഉപയോഗിക്കാവുന്ന 'കനേഡിയന്‍ കനോയ്', എട്ടുപേര്‍ക്ക് ഉപയോഗിക്കാവുന്ന 'ബനാനാ റൈഡ്' വാട്ടര്‍ സൈക്കിള്‍, പെഡല്‍ ബോട്ടുകള്‍, വള്ളം എന്നിവയാണു പാര്‍ക്കില്‍ ക്രമീകരിച്ചിരുന്നത്. ഇതിനുപുറമേ, വാട്ടര്‍ സോര്‍ബിംഗ്, പെഡല്‍ ബോട്ട് തുടങ്ങിയവയുമുണ്ടായിരുന്നു. എന്നാല്‍ ഈ ബോട്ടുകളെല്ലാം കൊടൂരാറ്റില്‍ പോളകയറിയതോടെ നശിക്കുകയാണ്. കോടിമതയിലെ ബോട്ടുജെട്ടിയില്‍നിന്നു ബോട്ടില്‍ വേമ്പനാട്ടു കായലില്‍ എത്തി സൂര്യാസ്തമയം കണ്ടു തിരികെയെത്തുന്ന രീതിലുള്ള പദ്ധതിയും വാട്ടര്‍ പാര്‍ക്കിന്റെ ഭാഗമായി ജില്ലാ ടൂറിസം പ്രമോഷന്‍ കൗണ്‍സില്‍ തയാറാക്കിയിരുന്നു.