വടകര: നഗരസഭ ആരോഗ്യ വിഭാഗം ഇന്നലെ നടത്തിയ പരിശോധനയില്‍ പഴകിയ ഭക്ഷണ പദാര്‍ഥങ്ങള്‍ പിടികൂടി. ഹെല്‍ത്ത് സൂപ്പര്‍വൈസര്‍ സുഗതകുമാരിയുടെ നേതൃത്വത്തിലാണ് പരിശോധന നടത്തിയത്.
മൂരാട് പാലത്തിന് സമീപത്തുള്ള ഹോട്ടല്‍ ഫിഷ് ക്ലബ്, മൂരാട് കള്ള്ഷാപ്പ്, സഹകരണ ആശുപത്രിക്ക് സമീപത്തെ പ്ലാസ റസ്‌റ്റോറന്റ് ആന്‍ഡ് കൂള്‍ബാര്‍, എന്‍.എ കൂള്‍ബാര്‍ ആന്‍ഡ് സ്റ്റേഷനറി, കരിമ്പന പാലത്തെ ഹോട്ടല്‍ ഉദ്യാന്‍ എന്നീ സ്ഥാപനങ്ങളില്‍ നിന്നാണ് ഭക്ഷ്യ യോഗ്യമല്ലാത്തതും പഴകിയതുമായ ആഹാര പദാര്‍ഥങ്ങള്‍ പിടിച്ചെടുത്ത് നശിപ്പിച്ചത്.
ഈ സ്ഥാപനങ്ങള്‍ക്കെല്ലാം നോട്ടിസ് നല്‍കിയിട്ടുണ്ട്. വൃത്തിഹീനമായ സാഹചര്യത്തില്‍ കച്ചവടം നടത്തുന്ന സഹകരണ ആശുപത്രിക്ക് സമീപത്തെ സൗമ്യ സനൂപ് ടീസ്റ്റാള്‍ എന്ന സ്ഥാപനത്തിനും നോട്ടിസ് നല്‍കി. പരിശോധനയില്‍ ഹെല്‍ത്ത് ഇന്‍സ്‌പെക്ടര്‍മാരായ പി.ജി അജിത്ത്, കെ. ബാബു, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ ദിലീപ്, രമിത, രജീഷ് പങ്കെടുത്തു.