സ്വന്തം ലേഖകന്‍
തിരുവനന്തപുരം: മന്ത്രി കെ.ടി ജലീല്‍ കേരള സര്‍വകലാശാലയില്‍ നിന്ന് നേടിയ പിഎച്ച്.ഡി പുനഃപരിശോധിക്കണമെന്നാവശ്യപ്പെട്ട് ഗവര്‍ണര്‍ക്ക് പരാതി. ഉദ്ധരണികള്‍ അക്ഷരത്തെറ്റുകളോടെ പകര്‍ത്തിയെഴുതിയാണ് പ്രബന്ധമായി സമര്‍പ്പിച്ചതെന്നും അതില്‍ ഗവേഷകന്റേതായി ഒന്നുമില്ലെന്നും ആരോപിച്ച് സേവ് യൂനിവേഴ്‌സിറ്റി കാമ്പയിന്‍ കമ്മിറ്റി സമര്‍പ്പിച്ച പരാതി, ഗവര്‍ണര്‍ തുടര്‍നടപടികള്‍ക്കായി കേരള സര്‍വകലാശാലാ വൈസ് ചാന്‍സിലര്‍ക്ക് കൈമാറി. വിശദമായ പരിശോധന നടത്തുന്നതിനാണ് ഗവര്‍ണര്‍ ആരിഫ് മുഹമ്മദ് ഖാന്‍ പരാതി സര്‍വകലാശാലാ വി.സിക്ക് കൈമാറിയത്.
മലബാര്‍ സമരത്തില്‍ വാരിയംകുന്നത്ത് കുഞ്ഞഹമ്മദ് ഹാജിയുടെയും ആലിമുസ്‌ലിയാരുടെയും പങ്കിനെക്കുറിച്ചു തയാറാക്കിയ ഗവേഷണ പ്രബന്ധത്തിനാണ് കെ.ടി ജലീല്‍ കേരള സര്‍വകലാശാലയില്‍ നിന്ന് 2006 ല്‍ ഡോക്ടറേറ്റ് നേടിയത്.
സിന്‍ഡിക്കേറ്റ് നിലവിലില്ലാതിരുന്ന പ്രത്യേക കാലയളവില്‍ വി.സി ആയിരുന്ന ഡോ.എം.കെ രാമചന്ദ്രന്‍ നായര്‍ ഇടപെട്ട് തന്റെ പ്രത്യേക അധികാരം ഉപയോഗിച്ചാണ് ജലീലിന് ഡോക്ടറേറ്റ് നല്‍കിയതെന്നും പരാതിയില്‍ പറയുന്നു.