ന്യൂഡല്‍ഹി: കോഴിക്കോട് ചാലിയത്ത് സ്ഥാപിക്കുന്ന ദേശീയ ഇന്‍സ്റ്റിറ്റ്യൂട്ട് ഫോര്‍ റിസര്‍ച്ച് ആന്‍ഡ് ഡവലപ്‌മെന്റ് ഇന്‍ ഡിഫന്‍സ് ഷിപ് ബില്‍ഡിന്റെ (നിര്‍ദേശ്) പ്രാഥമിക പ്രവര്‍ത്തനങ്ങള്‍ക്കായി 200 കോടി രൂപ അനുവദിക്കാനുള്ള കേന്ദ്രമന്ത്രിസഭ തീരുമാനം വേഗത്തിലാക്കാന്‍ നടപടി സ്വീകരിക്കുമെന്ന് പ്രതിരോധമന്ത്രി മനോഹര്‍ പരീക്കര്‍ ഉറപ്പുനല്‍കിയതായി എം.കെ രാഘവന്‍ എം.പി അറിയിച്ചു.
ഈ ആവശ്യം ഉന്നയിച്ചു എം.പി ഇന്നലെ കേന്ദ്രമന്ത്രിയെ കണ്ടിരുന്നു. 600കോടി രൂപ മുതല്‍മുടക്കുള്ള നിര്‍ദേശ് പദ്ധതിക്ക് കേരള സര്‍ക്കാര്‍ 40 ഏക്കര്‍ ഭൂമി സൗജന്യമായി നല്‍കിയിരുന്നു. പ്രാഥമിക പ്രവര്‍ത്തനങ്ങള്‍ക്കു ധനകാര്യമന്ത്രാലയം 200 കോടി രൂപ വകയിരുത്തുകയും ചെയ്തു. ഇത് പാസ്സാക്കുന്നതിന് കേന്ദ്രമന്ത്രി സഭയുടെ അനുമതി കൂടി ആവശ്യമാണ്.
എന്നാല്‍ ഇതുമായി ബന്ധപ്പെട്ട പ്രവര്‍ത്തനങ്ങള്‍ ഇഴഞ്ഞുനീങ്ങുകയായിരുന്നു. ഈ സാഹചര്യത്തില്‍ എം.പി കഴിഞ്ഞദിവസം കേന്ദ്ര ധനമന്ത്രി അരുണ്‍ ജെയ്റ്റ്‌ലിയെ കണ്ടിരുന്നു.
ഇതിനു പിന്നാലെയാണ് എത്രയും പെട്ടന്ന് കേന്ദ്ര മന്ത്രിസഭ തീരുമാനം ഉണ്ടാക്കാന്‍ നടപടി ആവശ്യപ്പെട്ട് പ്രതിരോധമന്ത്രിയെയും കണ്ടത്.