തിരുവനന്തപുരം: സംസ്ഥാനത്തെ വിവിധ ജില്ലകളിലേക്ക് വില്‍പ്പനക്കായി ബംഗളൂരുവില്‍നിന്നും കൊണ്ടുവന്ന മയക്കുമരുന്നുകള്‍ തിരുവനന്തപുരത്ത് എക്‌സൈസ് സംഘം പിടികൂടി. കോവളം കഴക്കൂട്ടം ബൈപ്പാസില്‍ വാഴമുട്ടം ഭാഗത്തുവച്ചാണ് കാറിന്റെ അടിഭാഗത്ത് പ്രത്യേകം നിര്‍മിച്ച അറയില്‍ സൂക്ഷിച്ചിരുന്ന ഹാഷിഷ് ഓയില്‍, കഞ്ചാവ്, ചരസ് എന്നീ മയക്കുമരുന്നുകള്‍ പിടികൂടിയത്.

മയക്കുമരുന്ന് കാറില്‍ കടത്തിക്കൊണ്ടുവന്ന കോട്ടയം ചക്കുപുരക്കല്‍ വീട്ടില്‍ ജോര്‍ജ് കുട്ടിയെ എക്‌സൈസ് സംഘം പിടികൂടി. പൊലിസ് ഓഫിസറെ കുത്തിപ്പരുക്കേല്‍പ്പിച്ചതുള്‍പ്പെടെ നിരവധി ക്രിമിനല്‍ കേസുകളിലും മയക്കുമരുന്ന് കേസുകളിലും പ്രതിയായ ഇയാള്‍ക്ക് കാപ്പ നിയമപ്രകാരമുളള നടപടി അനുസരിച്ച് കോട്ടയം ജില്ലയില്‍ പ്രവേശിക്കാന്‍ വിലക്കുണ്ട്.

ബംഗളൂരുവില്‍ താമസിക്കുന്ന ജോര്‍ജ് കുട്ടിക്ക് ആന്ധ്രയിലെ ലഹരി മാഫിയയുമായി അടുത്ത ബന്ധമാണുള്ളത്.