തിരുവനന്തപുരം: കേരള അടിസ്ഥാന സൗകര്യ വികസന നിധി ബോര്‍ഡി (കിഫ്ബി) നെതിരേ രാഷ്ട്രീയ ഗൂഢാലോചനയെന്ന് ധനമന്ത്രി തോമസ് ഐസക്. കിഫ്ബി ഭരണഘടനാവിരുദ്ധമാണെന്ന സി.എ.ജിയുടെ കരട് റിപ്പോര്‍ട്ട് കിഫ്ബിയെ തകര്‍ക്കാന്‍ ബി.ജെ.പിയും കോണ്‍ഗ്രസും നടത്തുന്ന രാഷ്ട്രീയ ഗൂഢാലോചനയുടെ ഭാഗമാണ്. പ്രതിപക്ഷ നേതാവിന്റെ ഓഫിസുമായി സി.എ.ജിക്ക് ബന്ധമുണ്ട്. സര്‍ക്കാരിനെതിരേ കേസിന് ചിലര്‍ ഗൂഢാലോചന നടത്തിയെന്നും മന്ത്രി ആരോപിച്ചു.
കിഫ്ബി വായ്പകള്‍ അനധികൃതമെന്നും ഭരണഘടനാ വിരുദ്ധമെന്നുമുള്ള കണ്ടെത്തലുകള്‍ ഓഡിറ്റ് വേളയില്‍ ഒരിക്കല്‍പ്പോലും ഉന്നയിക്കപ്പെട്ടിട്ടില്ല. കിഫ്ബിയുടെ രേഖകളെല്ലാം പരിശോധനയ്ക്കായി വിട്ടുനല്‍കി. 76 ഓഡിറ്റ് സംശയങ്ങളുയര്‍ത്തി. വിശദമായ മറുപടികളും നല്‍കി. ഓഡിറ്റിന്റെ അവസാനഘട്ടത്തിലെ ഉദ്യോഗസ്ഥതല യോഗത്തിലും എന്തെങ്കിലും ക്രമക്കേടു സംബന്ധിച്ച ആക്ഷേപമുണ്ടായില്ല.
മുന്‍ വര്‍ഷങ്ങളിലൊന്നുമില്ലാത്ത കണ്ടെത്തലുകളിലും ഇതേ വിഷയമുന്നയിച്ച് സ്വദേശി ജാഗരണ്‍ മഞ്ച് ഹൈക്കോടതിയില്‍ നല്‍കിയ ഹരജിയിലും ഗൂഢാലോചന നടന്നു. ബി.ജെ.പി നേതാവിനു വേണ്ടി ഹാജരായത് കെ.പി.സി.സി സെക്രട്ടറി മാത്യു കുഴല്‍നാടനാണ്.
ഗൂഢാലോചന നടന്നതിന്റെ തെളിവാണിത്. രാമനിലയത്തിലെ ചര്‍ച്ചക്കു ശേഷമാണ് ഹരജി നല്‍കിയതെന്നും ആരൊക്കെ ചര്‍ച്ചയില്‍ പങ്കെടുത്തുവെന്ന് അറിയാമെന്നും മന്ത്രി പറഞ്ഞു.
സംസ്ഥാനങ്ങളുടെ അധികാരം കവര്‍ന്ന് ഫെഡറല്‍ സംവിധാനം ഇല്ലാതാക്കാനാണ് ബി.ജെ.പി ശ്രമിക്കുന്നത്.
കിഫ്ബി വായ്പ എടുക്കുന്നത് ഭരണഘടനാ വിരുദ്ധമാണെന്ന് യു.ഡി.എഫ് കരുതുന്നുണ്ടോ. വായ്പകള്‍ ഭരണഘടന വിരുദ്ധമാണെന്ന് വരുത്തിത്തീര്‍ക്കാനാണ് കരട് റിപ്പോര്‍ട്ടിലൂടെ സി.എ.ജി ലക്ഷ്യമിടുന്നത്. പ്രതിപക്ഷ നേതാവിന്റെ ഓഫിസിലെ ആര്‍ക്കൊക്കെയാണ് സി.എ.ജിയുമായി ബന്ധം എന്ന് അറിയാം. ഇതിനെ പ്രതിരോധിക്കുമെന്നും മന്ത്രി വാര്‍ത്താ സമ്മേളനത്തില്‍ പറഞ്ഞു.ലോകം അംഗീകരിച്ച ഓഡിറ്റിങ്ങിന്റെ അടിസ്ഥാനപാഠം മറന്ന് രാഷ്ട്രീയ യജമാനനുവേണ്ടി വേട്ടയ്ക്കിറങ്ങിയിരിക്കുകയാണ് സി.എ.ജിയെന്ന് മന്ത്രി പിന്നീട് ഫേസ്ബുക്കില്‍ കുറിച്ചു. ഓഡിറ്റര്‍ കാവല്‍ നായയാണ്, വേട്ടപ്പട്ടിയല്ല എന്ന് വിഖ്യാതമായ ഒരു ചൊല്ലുണ്ട്. ഇതു മറന്നാണ് സി.എ.ജി വേട്ടയ്ക്കിറങ്ങിയിരിക്കുന്നത്. കിഫ്ബിയ്‌ക്കെതിരേ സി.എ.ജി പ്രഖ്യാപിച്ചിരിക്കുന്ന യുദ്ധം സ്വന്തം പദവിയുടെ ഭരണഘടനാ വിശുദ്ധിയും അന്തസും ബലികഴിച്ചുള്ള നഗ്‌നമായ രാഷ്ട്രീയക്കളിയാണ്. സി.ബി.ഐയെ കൂട്ടിലടച്ച തത്തയാക്കിയവര്‍ സി.എ.ജിയെ തുടലഴിച്ചുവിട്ട വേട്ടനായയാക്കിയിരിക്കുകയാണ്. ഇതൊന്നും കേരളം അനുവദിച്ചു തരുമെന്നു കരുതരുതെന്നും മന്ത്രി ഐസക് വ്യക്തമാക്കി.

'ട്രഷറി തട്ടിപ്പ്: വിജിലന്‍സ് അന്വേഷണം വേണ്ട'

തിരുവനന്തപുരം: വഞ്ചിയൂര്‍ സബ് ട്രഷറിയില്‍ നടന്ന തട്ടിപ്പ് വിജിലന്‍സ് അന്വേഷണത്തിന് വിടേണ്ടതില്ലെന്ന് ഉത്തമബോധ്യമുണ്ടെന്ന് ധനമന്ത്രി തോമസ് ഐസക്. വിജിലന്‍സ് അന്വേഷണത്തിന്റെ ആവശ്യമില്ല. ഉത്തരവാദിയായ ഉദ്യോഗസ്ഥനെ സര്‍വിസില്‍നിന്ന് നീക്കി. സംഭവത്തില്‍ വകുപ്പുതല അന്വേഷണ റിപ്പോര്‍ട്ട് ലഭിച്ചിട്ടുണ്ട്. ഇതിന്റെ അടിസ്ഥാനത്തില്‍ ഉദ്യോഗസ്ഥതല വീഴ്ചകളില്‍ ദിവസങ്ങള്‍ക്കുള്ളില്‍ നടപടിയുണ്ടാകും. ഗൂഢാലോചനാ പ്രശ്‌നമൊന്നും ഉയര്‍ന്നുവന്നിട്ടില്ലാത്തതിനാല്‍ വിജിലന്‍സ് അന്വേഷണത്തിന്റെ ആവശ്യമില്ലെന്നാണ് വിലയിരുത്തല്‍.
വിജിലന്‍സ് അന്വേഷിച്ചാലും ഇതിലപ്പുറമൊന്നും ചെയ്യാനില്ലെന്നും മന്ത്രി പറഞ്ഞു.
ട്രഷറി സോഫ്റ്റ്‌വെയര്‍ നിലവില്‍ വന്നശേഷം പ്രവര്‍ത്തന ഓഡിറ്റിങ് നടത്തിയിരുന്നില്ല. സര്‍ക്കാരിന്റെ പ്രവര്‍ത്തന രീതികളിലും ട്രഷറി ഇടപാടുകളുടെ സ്വഭാവത്തിലുമുണ്ടാകുന്ന മാറ്റങ്ങളും പുതിയ ഇടപാടുകളും തടസമായി. ഇപ്പോള്‍ പ്രവര്‍ത്തന ഓഡിറ്റിങ്ങും സുരക്ഷാ ഓഡിറ്റിങ്ങും നടക്കുകയാണ്. റിപ്പോര്‍ട്ടിന്റെ അടിസ്ഥാനത്തില്‍ കൂടുതല്‍ സുരക്ഷാ നടപടികളുണ്ടാകുമെന്നും മന്ത്രി പറഞ്ഞു.