തൃശ്ശൂര്‍: ക്രൈസ്തവ വിശ്വാസികളുടെ വികാരം വ്രണപ്പെടുത്തിയെന്ന് ആരോപണം ഉയര്‍ന്ന കാര്‍ട്ടൂണ്‍ വിവാദത്തില്‍ കേരള ലളിതകലാ അക്കാദമി സെക്രട്ടറി പൊന്ന്യം ചന്ദ്രന് നേരെ വധഭീഷണി മുഴക്കിയയാള്‍ അറസ്റ്റില്‍. എറണാകുളം ചേരാനെല്ലൂര്‍ എടവൂര്‍ ചിറ്റപ്പറമ്പന്‍ ഹൗസില്‍ സി.പി തോമസ് (45) ആണ് അറസ്റ്റിലായത്. ഇയാളെ ജാമ്യത്തില്‍ വിട്ടയച്ചു. ജൂണ്‍ 13നാണ് പൊന്ന്യം ചന്ദ്രനെ ഫോണില്‍ വിളിച്ച് സി.പി തോമസ് വധഭീഷണി മുഴക്കിയത്. ഇതേതുടര്‍ന്ന് പൊന്ന്യം ചന്ദ്രന്‍ നല്‍കിയ പരാതി പ്രകാരം നടത്തിയ അന്വേഷണത്തിലാണ് പ്രതി പിടിയിലായത്. കത്തോലിക്കാസഭയുടെ പ്രതിനിധി എന്ന് പറഞ്ഞു തോമസ് തുടങ്ങിയ ഫോണ്‍വിളി ഇരുപതുമിനിറ്റോളം നീണ്ടിരുന്നു. ഫോണ്‍ സംഭാഷണത്തിന്റെ വോയിസ് റെക്കോര്‍ഡും പരാതിക്കൊപ്പം നല്‍കിയിരുന്നു. തൃശ്ശൂര്‍ ഈസ്റ്റ് എസ്.ഐ ഉമേഷ് കെ. നേതൃത്വം നല്‍കിയ സംഘമാണ് അറസ്റ്റ് ചെയ്തത്.

കന്യാസ്ത്രീയെ ലൈംഗികമായി പീഡിപ്പിച്ച കേസിലെ പ്രതി ജലന്ധര്‍ ബിഷപ്പ് ഫ്രാങ്കോ മുളയ്ക്കലിനെ വിമര്‍ശനാത്മകമായി ചിത്രീകരിച്ച കെ.കെ സുഭാഷിന്റെ കാര്‍ട്ടൂണിന് പുസ്‌കാരം നല്‍കാനുള്ള ലളിതകല അക്കാദമിയുടെ തീരുമാനം വിവാദമായിരുന്നു. അക്കാദമിയോട് തീരുമാനം പിന്‍വലിക്കാന്‍ സാംസ്‌കാരികമന്ത്രി എ.കെ ബാലന്‍ ആവശ്യപ്പെട്ടെങ്കിലും അക്കാദമി വഴങ്ങിയിരുന്നില്ല. ഈ പശ്ചാത്തലത്തിലാണ് അക്കാദമി സെക്രട്ടറിയെ പ്രതി ഫോണില്‍ വിളിച്ച് ഭീഷണിപ്പെടുത്തിയത്.

cartoon controversy lalitha kala academy secretary gets death threat; accused held