ചെന്നൈ: തൂത്തുക്കുടിയില്‍ ജനങ്ങളുടെ പ്രതിഷേധത്തെ തുടര്‍ന്ന് അടച്ചുപൂട്ടിയ സ്റ്റെര്‍ലിറ്റ് കമ്പനി തുറന്ന് പ്രവര്‍ത്തിക്കാന്‍ അനുവദിക്കില്ലെന്ന് തമിഴ്‌നാട് സര്‍ക്കാര്‍.
ദേശീയ ഹരിത ട്രൈബ്യൂണല്‍ നിയോഗിച്ച മൂന്നംഗ പ്രത്യേക സമിതിയും മുന്‍മേഘാലയ ഹൈക്കോടതി ചീഫ് ജസ്റ്റിസ് തരുണ്‍ അഗര്‍വാളും കമ്പനി സന്ദര്‍ശിച്ച് സ്ഥിതിഗതികള്‍ വിലയിരുത്താനിരിക്കേയാണ് തമിഴ്‌നാട് സര്‍ക്കാര്‍ നിലപാട് വ്യക്തമാക്കിയത്.
ഒരിക്കല്‍ അടുച്ചുപൂട്ടിയ കമ്പനി വീണ്ടും തുറക്കുകയെന്ന കാര്യത്തില്‍ സര്‍ക്കാരിന് രണ്ട് അഭിപ്രായമില്ല. പ്ലാന്റ് സീല്‍ വച്ചുകൊണ്ട് സര്‍ക്കാര്‍ സ്വീകരിച്ച തീരുമാനം വീണ്ടും പുനഃപരിശോധിക്കില്ല. കമ്പനി തുറക്കണമെന്ന ആവശ്യം ദേശീയ ഹരിത ട്രൈബ്യൂണല്‍ അടക്കമുള്ളവര്‍ മുന്നോട്ടുവച്ചാല്‍ അതിനെതിരേ സുപ്രിംകോടതിയെ സമീപിക്കാനാണ് സര്‍ക്കാര്‍ തീരുമാനമെന്ന് സംസ്ഥാന ഫിഷറീസ് മന്ത്രി ഡി. ജയകുമാര്‍ അറിയിച്ചു.
ജനങ്ങള്‍ ഈ ഫാക്ടറിക്കെതിരാണ്. ഇതേതുടര്‍ന്നാണ് ഇത് അടച്ചത്. തൂത്തുക്കുടിയിലെ ജനങ്ങളുടെ താല്‍പര്യമാണ് സര്‍ക്കാര്‍ പരിഗണിക്കുന്നതെന്നും മന്ത്രി പറഞ്ഞു.